DISPELA snek i raunim diwai, yu ting em i snek tru? Nogat. Ol i bin wokim dispela snek long bras. Jehova i tokim Moses long putim snek long diwai na ol manmeri i ken lukim na ol i no ken i dai. Tasol ol narapela snek i stap long graun, ol i snek tru. Ol i kaikaim ol manmeri na mekim ol i sik. Yu save bilong wanem dispela samting i kamap?

Dispela samting i kamap, long wanem, ol Israel i mekim tok nogut long God na Moses. Ol i tok: ‘Bilong wanem yu kisim mipela long Isip na bringim mipela i kam bilong i dai long dispela ples drai nating? I no gat kaikai na wara long hia. Na mipela i les pinis long kaikai mana.’

Tasol mana em i gutpela kaikai. Jehova i wokim mirakel na givim dispela kaikai long ol. Na em i wokim mirakel na givim wara tu long ol. Tasol ol manmeri i no tenkyu long ol samting God i mekim bilong lukautim ol. Olsem na Jehova i salim ol dispela snek nogut bilong givim strafe long ol Israel. Ol snek i kaikaim ol, na planti bilong ol i dai.

Bihain ol manmeri i kam long Moses na tok: ‘Mipela i bin mekim rong, long wanem, mipela i bin tok nogut long Jehova na long yu. Beten askim Jehova long rausim ol dispela snek.’

Olsem na Moses i beten bilong helpim ol manmeri. Na Jehova i tokim Moses long wokim dispela snek bras. Em i tokim Moses long putim dispela snek long wanpela diwai, na husat man em snek i kaikaim em, em i mas lukluk i go long en. Moses i mekim stret samting God i tok long en. Na ol manmeri em snek i kaikaim ol, ol i lukluk long dispela snek bras na ol i kamap orait gen.

Dispela inap lainim yumi long wanpela samting. Yumi olgeta i kain olsem ol Israel em snek i kaikaim ol. Yumi olgeta i stap long mak bilong i dai. Lukim ol man, na yu bai lukim olsem ol i wok long i go lapun, kisim sik na i dai. Dispela samting i kamap, long wanem, namba wan man na meri, em Adam na Iv, ol i lusim Jehova, na yumi olgeta i pikinini bilong ol. Tasol Jehova i bin wokim rot na bai yumi inap i stap oltaim.

Jehova i bin salim Pikinini bilong em, Jisas Krais, i kam long graun. Ol i hangamapim Jisas long wanpela diwai, long wanem, planti man i ting em i man nogut. Tasol Jehova i bin salim Jisas bilong helpim yumi. Sapos yumi lukluk long em, olsem bihainim em, yumi inap kisim laip oltaim. Bihain bai yumi kisim sampela save moa long dispela samting.