XANA a nyoka liyani yi tsonzeleleko mhanze a yo ku khwatsi ya lisine ke? A hi ya lisine. A nyoka leyi yi mahilwe hi suku. Jehova i leletele Mosi a ku yi hayeka laha ka mhanze lezaku a vanhu va yi cuwuka kasi va fela a ku simama va hanya. Kanilezi a tinyoka tinwani leti ti nga lahasi ta lisine. Tona ti lumile vanhu ti tlhela ti va babyisa. Wa zi tiva a ku hikuyini?

Hi lezaku a vaIsraeli va solile Nungungulu na Mosi. Va lo vilela vaku: ‘Hikuyini mu nga hi humesa le Gipite kasi hi ta fela ka xiwula lexi ke? A ku na zakuga kutani mati lomu. Hi karele hi kuga manna lawa.’

Kanilezi a manna i zakuga za zi nene. Jehova i va nyikile zakuga lezo hi xihlamaliso. Niku i tlhelile a va nyika mati hi xihlamaliso. Hambulezo a vanhu a va bongi hi lezi Jehova a va hlayisisako zona. Hizalezo Jehova i rumela tinyoka leti ta wuxungu kasi ku tsayisa a vaIsraeli. Vona va lumiwa hi tinyoka leto, ni vanyingi xikari kabye vafa.

Hi kugumesa a vanhu va tela Mosi va taku: ‘Hi onhile, hakuva hi solile Jehova na wena. Makunu hi kombelele ka Jehova kasi a hlongola a tinyoka leti.’

Hikwalaho Mosi i khongelela a vanhu. Jehova i byela Mosi a ku maha a nyoka leyi ya suku. Yena i mu leletela a ku yi hayeka laha ka mhanze, lezaku vontlhe lava va lumiwako va yi cuwuka. Mosi i maha zontlhe lezi Nungungulu a wulako. Ni vanhu lava va lumiwako va cuwuka a nyoka ya suku va kalamuka.

Ku na ni xo kari hi gonzako hi lezo. Hina hontlhe, hi ndlela yo kari, hi fanana ni vaIsraeli lavayani va lumilweko hi tinyoka. Hontlheni hi lomu ka xiyimo xa kufa. Cuwuka matlhelweni, u ta wona lezaku a vanhu va khosahala, va babya, va guma vafa. Lezo zi tano hakuva a wanuna ni wasati vo sangula, Adamu na Eva, va ti hambanyisile na Jehova, niku hina hontlhe hi vana vabye. Kanilezi Jehova i vulile ndlela ya lezaku hi zi kota ku hanya kala kupinzuka.

Jehova i rumele N’wana wakwe, Jesu Kristu, a kuta misaveni. Jesu i hayekilwe laha ka mhanze, hakuva a vanhu vo tala va wa pimisa a ku yena i wa hi munhu wo biha. Kanilezi Jehova i nyikele Jesu akuva a hi hanyisa. Loku hi mu cuwukela, hi mu lanzela, ha zi kota ku kuma wutomi ga pinzukelwa. Hi ta gonza zinwani xungetano hi lezo le mahlweni.