EGYO enjoka eyezingiriire hanyomyo njoka nk’ezindi Mali? Teri njoka kwo. Enjoka enu ekozerwe omu mulinga. Yahwe akagambira Musa kugihanika ha nyomyo nukwo abantu abaragiroraho babe bomezi. Baitu ezo eziri hansi njoka zonyini. Zitemere abantu n’okubarwaza. N’omanya habwaki?

Nahabwokuba Abaisareri baali bajumire Ruhanga na Musa. Bakatontoroma bati: ‘Habwaki watwihire Misiri kutuleeta tufeere omu irungu? Tihalimu byokulya ebirungi n’amaizi. Tujwahire kulya emanu yonka.’

Baitu emanu byali byokulya ebirungi. Yahwe akagibaha kuraba mukyamahano, Akabaha n’amaizi nago okuraba mukyamahano. Baitu abantu batasiime omulingo Ruhanga akaba abaroleriremu. Nukwo Yahwe kutweka enjoka ez’obusagwa kufubira Abaisareri. Enjoka zikabatema, kandi baingi baafa.

Hanyuma abantu bakaizira Musa bamugambira bati: ‘Tusiisire, twajuma Yahwe naiwe. Hati tusabire hali Yahwe atwiheho enjoka zinu.’

Hanyuma Musa asabira abantu. Yahwe agambira Musa okukora enjoka y’omulinga. Agambirwa kugita ha nyomyo, nukwo buli muntu wena arabaga atemerwe enjoka aragirorahoga. Nukwo Musa kukora nkoku Ruhanga yamugambiire. Kandi abantu abatemwaga enjoka, obu baroraga ha njoka y’omulinga, bakiraga.

Haroho eky’okwega kuruga hali kinu. Itwena nitusisana nk’Abaisareri abatemerwe enjoka. Tuli mu mulingo gw’okufa. Abantu boona abatwehingulirize nibarwara, nibakaikura kandi nibafa. Kinu kiri kiti habwokuba Adamu na Hawa omusaija n’omukazi ab’okubanza bakajemera Yahwe. Naitwe itwena tuli baijukuru babu. Baitu Yahwe akatuteraho entekaniza eyokusobora kwomera ebiro byoona.

Yahwe akasindika Yesu Kristo, Omwana we hansi. Yesu akahanikwa ha muti habwokuba abantu baingi bakamurora nk’omubi. Baitu Yahwe akatuha Yesu okutucungura. Kakuba nitumwesiga n’okumukuratira, nitwija kutunga obwomezi obutahwaho. Baitu kinu nitwija kukyegaho mumaiso aho.