Mwaha 41: Enowa Ya Muxukhuma
KHENKHALA ntoko enowa yekeekhai ele evitikeeleliwe vakoponi? Ela khahiyo. Enowa eyo epakiwe ni muxukhuma. Yehova aahimuleela Moise ohela vamwirini wira atthu aweryeke oweha ni ovikaniha okhala akumi. Masi inowa sikina siri vathii ti sekeekhai. Iyo sihaaluma atthu ni sinniwiiriha owereiwa. Nyuwo munnisuwela nthowa naya?
Nthowa noowi anaIsarayeli aalavula momvaanyiha Muluku ni Moise. Awo anninlaseya ariki: ‘Munikumihenryeni wEjiitu wira nikhweleke mothakoni-mu? Va khivakhanle yoolya hataa maasi. Nto hiyo nootemwa olya emanaa ela.’
Masi emanaa yoolya yooloka. Mwa mutikiniho Yehova aahaavaha awo. Ni mwa mutikiniho aahaavaha-tho maasi. Masi atthu khanixukhuru wa Muluku mmoota onaakhapelela awe. Siiso Yehova onnirumiha inowa iya sootakhala wira waahukhumu anaIsarayeli. Inowa sinnaaluma awosa, nto anceene a yaawo annookhwa.
Wanikisa waya atthu annoorwa wa Moise khiyahimya so: ‘Hiyo noottheka, okhala wira noolavula momvaanyiha Yehova ni nyuwo. Vano vekelani wa Yehova wira okumihe inowa iya.’
Siiso Moise onnaavekelela atthu awo. Nto Yehova onimuleela Moise opaka enowa ela ya muxukhuma. Owo onnimuleela ohela vamwirini, wira ori otheene onilummwa oweryeke oweha ela. Moise onipaka ntoko siiso Muluku sinihimya awe. Nto atthu yaawo yaalummwale anniweha enowa ya muxukhuma ni khiyakhala-tho saana.
Mwa ela yookhala etthu yowiixutta. Otheene ahu, mmukhalelo mukina, ninlikana ni anaIsarayeli yaale yaalummwale ni inowa iye. Hiyo otheene nrii mmukhalelo wookhwa. Nkaweha-wehani, nto munrowa woona wi atthu animuuluvala, owereiwa ni okhwa. Ela mwaha woowi mulopwana ni muthiyana oopacerya, Adamu ni Eva, yaahimurukunuwela Yehova, nto hiyo otheene nrii anaaya. Masi Yehova oopaka etthu wira niwerye okhala moohimala.
Yehova aahimurumiha Mwanawe, Yesu Kristu, valaponi. Yesu aathomeiwale vamwirini, okhala wira atthu anceene yaapuwela wi aari ootakhala. Masi Yehova aahinvaha Yesu wira onoopole. Akhala wira ninweha wa owo, omutthara owo, nto nnoowerya okhalana okumi woohimala. Masi ninrowa wiixutta sinceene voohimya sa ela muhoolo.
Mothakoni 21:4-9; Yohani 3:14, 15.
Makoho
- Valataratoni va, tanii ela evitikeeleliwe vakoponi, ni nthowa xeeni Yehova aamuleelalya awe Moise wira okuhe vale?
- Moota xeeni atthu ary’aya oohixukhuru mu sotheene seiye Muluku sinwiirela awe?
- Exeeni atthu aninvekela aya Moise wira opake nuumala Yehova orumiha inowa sootakhala wira aahukhumu?
- Nthowa xeeni Yehova onimuleela awe Moise wira opake enowa ya muxukhuma?
- Etthu xeeni ninwerya ahu wiixutta mmwaha ola?
Makoho oowuncererya
- Mmusome Mothakoni 21:4-9.
Wunlaseya wa Isarayeli onnivaha yoolopola xeeni voohimya sa soovaha sa Yehova? (Moth 21:5, 6; aRom 2:4)
Mu iseekulu soottharelana, anaIsarayeli yaarumenle sai enowa ya muxukhuma, nto etthu xeeni yaapanke awe Mwene Ezekiya? (Moth 21:9; 2 Mam 18:1-4)
- Mmusome Yohani 3:14, 15.
Moota xeeni okuhiwa wa enowa ya muxukhuma vamwirini onthoonyerya aya saana okhomeliwa wa Yesu Kristu? (aGal 3:13; 1 Ped 2:24)
