ANA lijoka lyalilisyengenye mcitelalyo likuwoneka mpela lisyesyene? Iyayi. Lijokalyo lili lyakupanganya ni nakaliwu. Yehofa ŵamsalile Musa kuti aliŵice pa citelaco kuti ŵandu akomboleje kulilola kuti aŵe ni umi. Nambo majoka gagali pasigo gali gasyesyene. Galumile ŵandu ni kwalwasya. Ana akumanyilila ligongo lyakwe?

Lili ligongo lyakuti Ayisalayeli aŵecete mwakusisyana ni Mlungu, soni Musa. Jemanjaji akudandawula acitiji: ‘Ligongo cici mwatukopwesye mu Eguputo kuti tuwile mwipululu muno? Amuno mwangali cakulya, soni mesi. Soni m’weji ngaŵa mkupakombola kulamila managa.’

Nambo mana cili cakulya cambone. Yehofa ŵapele mwakusimonjesya. Ŵapelesoni mesi mwakusimonjesya. Nambo ŵanduŵa ngakuyamicila yatesile Mlungu pakwasamalila. M’yoyo Yehofa akwapa cilango mwakwatumicisya majoka ga ululuga. Majokaga gakwaluma, soni ŵajinji akuwa.

Kaneko ŵanduwo akwawula kwa Musa nikumsalila kuti: ‘Tulemwisye, ligongo tuŵecete mwakusisyana ni Yehofa, soni mmwejo. Sambano mpopele kwa Yehofa kuti atutyocesye majokaga.’

M’yoyo Musa akwapopelela ŵandu ŵala. Sambano Yehofa akumsalila Musa kulinganya lijoka lya nakaliwuli. Akumsalila kuti aliŵice pacitela, kuti jwalijose jwalimlumile lijoka aloleje lijoka lyalili pacitelali. Musa akutenda yamsalile Mlungu. Sambano ŵandu ŵalyalumile lijoka akulola lijoka lya nakaliwuli, ni akulama.

Pelepa pana lijiganyo lyatukulijiganya. Wosopewe, tuli mpela Ayisalayeli ŵakulumigwa ni majoka. Wosope tuli mundamo jakuwa. Alole kuti ŵandu akucekulupa, akulwala, soni akuwa. Yeleyi yikutendekwa ligongo lyakuti ŵandu ŵandanda kwapanganya, Adamu ni Hawa, nganapikanila Yehofa, soni wosopem’we tuli ŵanace ŵawo. Nambo Yehofa alinganyisye litala lyakuti mpaka tuŵe ni umi wangamala.

Yehofa ŵatumisye Mwanagwe, Yesu Klistu, ku cilambo capasi. Yesu ŵamkomele pacitela, ligongo ŵandu ŵajinji ŵaganisyaga kuti ali jwakusakala. Nambo Yehofa ŵatupele Yesu kuti atukulupusye. Naga tukulola pa jwalakwe, soni kumkuya, tucipata umi wangamala. M’bujomu citulijiganye yejinji ya nganiji.