Ododo 42

Kana Oloko

KONG ibiwinyo ni kana mo oloko? Itwero waco ni: ‘Pe. Lee pe twero lok.’ Ento Baibul tito pi kana mo ma oloko. Wanenu kong kit ma otimme kwede.

Luicrael onongo dong guyubbe ma gicok donyo i lobo Kanaan. Balak, kabaka me Moab, onongo lworo jo Icrael. Pi meno en ocwalo lwongo bot laryeko mo ma nyinge Balaam ni obin wek ocen jo Icrael. Balak ocikke ni ebimiyo cente madwong bot Balaam, pi meno Balaam oito i wi kanane ci ocako cito ka neno Balak.

Jehovah pe mito ni Balaam ocen jone. Pi meno en ocwalo lamalaika ki pala lucwan mabor me cung i gudo me juko Balaam. Balaam pe twero neno lamalaika-ni, ento kanane aye neno. Pi meno kana obedo ka temme me a woko ki nyim lamalaika-ni, nio ka lacen obuto woko piny. Kiniga omako Balaam adada, ci ogoyo kana ki odoo.

Ci Jehovah omiyo Balaam owinyo ka kanane tye ka lok kwede. Kana openyo ni: ‘Atimmi ngo kara ma weko i goya?’

Balaam owaco ni: ‘Imiyo adoko calo laming. Ka onongo atye ki pala lucwan, kono aneki woko!’

Kana openyo ni: ‘Kong yam con atimme kit man boti?’

Balaam ogamo ni: ‘Pe.’

Cutcut Jehovah omiyo Balaam oneno lamalaika-ni ka ocung i dye gudo ki pala lucwan i cinge. Lamalaika-ni owaco ni: ‘Pingo igoyo kanani? An abino ka gengo yoni, pien omyero pe icit icen Icrael. Ka nene kanani pe onyiko woko cen ki bota, onongo kono atongi aneki woko, ento onongo pe awano kanani.’

Balaam owaco ni: ‘An abalo. Onongo pe angeyo ni icung i dye gudo.’ Lamalaika-ni oweko Balaam, ci Balaam ocito ka neno Balak. En pud otemo ceno Icrael, ento, ma ka ceno, Jehovah omiyo en ogoyo laa i kom Icrael tyen adek.

Wel 21:21-35; 22:1-40; 23:1-30; 24:1-25.