ANƐ o nu kaa teji tu munyu hyɛ lo? Eko ɔ, o ma de ke, ‘Dɛbi, lohwe be nyɛe maa tu munyu.’ Se Baiblo ɔ gba teji ko nɛ́ tu munyu he sane. Ha nɛ waa hyɛ bɔnɛ e ba ha.

E piɛ bɔɔ nɛ Israelbi ɔmɛ maa su Kanaan zugba a nɔ. Balak, nɛ ji Moab matsɛ ɔ ngɛ Israelbi ɔmɛ gbeye yee. Enɛ ɔ he ɔ, e tsɔ kaa a ya tsɛ nyumu gatsɛ ko nɛ a tsɛɛ lɛ Balaam kɛ ba, konɛ e ba gbiɛ Israelbi ɔmɛ. Balak wo Balaam si kaa e ma ha lɛ sika fuu, lɔɔ he ɔ, Baalam kuɔ teji nɛ e hia blɔ konɛ e ya na Balak.

Yehowa sume kaa Balaam nɛ́ gbiɛ E webi ɔmɛ. Lɔɔ heje ɔ, e tsɔ e bɔfo ko nɛ hɛɛ klaate gagaa, kɛ ya po Balaam ngɛ blɔ nɔ konɛ e tsi lɛ blɔ. Balaam nɛ́ bɔfo ɔ, se e teji ɔ lɛɛ e na bɔfo ɔ. Lɔɔ he ɔ, teji ɔ gba kɛ je blɔ ɔ nɔ si abɔ ngɛ bɔfo ɔ hɛ mi, nɛ nyagbe ɔ, e hwɔ si ngɛ blɔ ɔ mi. Baalam mi mi fu wawɛɛ, nɛ e fiaa e teji ɔ tso.

Kɛkɛ nɛ Yehowa ha nɛ teji ɔ kɛ Balaam tu munyu. Teji ɔ bi lɛ ke: ‘Mɛni i pee mo loko o ngɛ mi tso fiaae ɔ?’

Balaam ha heto ke, ‘O ha nɛ i pee kaa kuasia. I hɛɛ klaate jinɛ i ko gbe mo!’

Teji ɔ bi Balaam ke: ‘Anɛ i pee mo nɔ́ ko kaa kikɛ hyɛ lo?’

Balaam ha teji ɔ heto ke, ‘Dɛbi.’

Kɛkɛ nɛ Yehowa ha Balaam na bɔfo ɔ nɛ hɛɛ klaate ɔ ngɛ blɔ mi ɔ. Bɔfo ɔ de lɛ ke: ‘Mɛni heje nɛ o fiaa o teji ɔ tso ɔ? I ba tsi mo blɔ, ejakaa e sɛ kaa o ya nɛ o ya gbiɛ Israel. Kaa o teji ɔ ji blɔ ɔ mi ɔ, jinɛ i ko gbe mo, se o teji ɔ lɛɛ i ko pee we lɛ nɔ́ ko.’

Balaam de ke: ‘I pee yayami. I li kaa mo lɛ o ba po mi blɔ.’ Bɔfo ɔ ha Balaam blɔ nɛ e ho, nɛ Balaam ya na Balak. Se kɛ̃ ɔ, Balaam bɔ mɔde kaa e maa gbiɛ Israel, se Yehowa ha nɛ e jɔɔ Israel mohu si etɛ.