Maana 42nan

Fali dɔ kumana

YALA i delila k’a mɛn ko fali dɔ kumana wa? I bɛna a fɔ ‘ayi, bawo baganw tɛ se ka kuma.’ Nka Bibulu dun b’a fɔ ko fali dɔ kumana. O sera ka kɛ cogo di? An k’o lajɛ ɲɔgɔn fɛ.

Israɛlkaw tun bɛna don sɔɔni Kanan jamana na. Moab masakɛ Balak siranna kosɛbɛ Israɛlkaw ɲɛ. O la sa, a ye dɔnnikɛla dɔ wele min tɔgɔ ye ko Balam, walisa o ka na ka Israɛlkaw danga. Balak ye layidu ta Balam ye ko a bɛna wari caman di a ma. Balam yɛlɛnna a ka fali kan ka taa Balak fɛ.

Nka, Jehova t’a fɛ Balam ka Ale ka jamakulu danga. A ye mɛlɛkɛ dɔ ci ka sira tigɛ Balam ɲɛ. Npan murujan tun bɛ o mɛlɛkɛ bolo. Balam tun ɲɛ tɛ mɛlɛkɛ la, nka a ka fali tun ɲɛ bɛ mɛlɛkɛ la. O kosɔn, fali y’a ɲini ka sira bila, nka, a ma se. A labanna k’i da sira kan. Balam diminna kosɛbɛ. A y’a ka fali bugɔ ni bere ye.

Jehova y’a kɛ Balam ka  a ka fali ka kuma mɛn. Fali y’a ɲininka ko: ‘Ne ye mun kɛ i la n’i bɛ ne bugɔ?

Balam y’a jaabi ko: ‘I ye ne filɛ lagalagatɔ ye. Ni npan tun bɛ ne bolo ne tun na i faga!’

Fali y’a ɲininka ko: ‘Yala ne delila ka nin ɲɔgɔn kɛ i la wa?

Balam ko: ‘Ayi.’

O la sa, Jehova y’a kɛ Balam ye mɛlɛkɛ jɔlen ye sira kan ni npanmuru ye a bolo. Mɛlɛkɛ ko: ‘Mun na i ye i ka fali bugɔ? Ne nana ka sira tigɛ i ɲɛ bawo i man kan ka taa Israɛl danga. N’i ka fali tun ma a ɲini ka sira bila, k’a mabɔ ne la, ne tun na i faga, nka ne tun tɛna fosi kɛ i ka fali la.’

Balam ko: ‘Ne ye jurumu kɛ. Ne tun m’a dɔn ko i jɔlen bɛ sira kan.’ Mɛlɛkɛ ye Balam to a ka taa Balak fɛ. O yɔrɔ la yen, Balam y’a ɲini cogo bɛɛ la ka Israɛl danga, nka a ma se. Jehova y’a kɛ Balam ye dugawu de kɛ Israɛl ye fo siɲɛ saba.

Nɔnburuw 21:​21-35; 22:​1-40; 23:​1-30; 24:​1-25.