YENA hiunevu kama umwe chimbulu kanahanjika? Kota yena muhasa kwamba ngwo, ‘Ka.’ Mumu tushitu keshi kuhanjika.’ Alioze Mbimbiliya yinatulweze ngwo umwe chimbulu kanakahanjika. Tutalenu chize chino chinakapwa.

A-Izalele te kananjila mu chifuchi cha Kanana. Mbalake, mwanangana wa Moape, yevwa woma wa A-Izalele. Kashika iye yasanyika umwe lunga wa kanyama jina lienyi te Mbalau hanga ashinge A-Izalele. Mbalake yalakenya kuhana mbongo jinji kuli Mbalau, kashika Mbalau yakwata chimbulu wenyi yaya hanga aliwane ni Mbalake.

Yehova kakazangile hanga Mbalau ashinge atu jenyi. Chocho iye yatuma umwe mungelo te kali ni njangu yisuku hanga amane mu tapalo akanjise Mbalau. Mbalau kakahashile kumona mungelo wacho, alioze chimbulu wenyi yamumona. Chimbulu yalinga tachi hanga akondoloke mungelo, mba alioze yautama kwenyi hashi mu tapalo. Mbalau yevwa uli unji, hi yaputuka kulamba chimbulu wenyi ni kapama.

Hi Yehova yahanjikisa chimbulu hanga Mbalau amwivwe. Chimbulu yahula ngwenyi, ‘Yika yami nakulinga unangulambila chocho?’

Mbalau yakumbulula ngwenyi, ‘Mumu yena wanguhepwisa. Nyi te nguli ni yimwe njangu kachi nakushaha!’

Chimbulu yahula kuli iye ngwenyi: ‘Yami hingunakulinga kama chuma chino limwe tangwa?’

Mbalau yakumbulula ngwenyi, ‘Ka.’

Hohene Yehova yapangulwisa meso ja Mbalau, mba hi iye yamona mungelo kanamana mu tapalo ni njangu yenyi. Mungelo yamba ngwenyi: ‘Mumu liaka walamba chimbulu we? Yami neza hanga ngukujikinyine mu jila, mumu chakutambile kuya hanga ukashinge Izalele. Nyi kachi chimbulu we kangukondolokele, kachi te nakushahanga kulu, alioze chimbulu we te chichi kumulemeka.’

Mbalau yamba ngwenyi: ‘Yami hinavulumuna. Yami te chiso kunyngika ngwo yena unamana mu tapalo.’ Mungelo yecha Mbalau hanga aye, chocho Mbalau yaya hanga akahanjike ni Mbalake. Chipwe chocho iye kanakeseka kushinga Izalele, alioze Yehova yamushinjila hanga awahise Izalele katatu keswe.