Okasino make hungire
EHUNGI 42
Okasino make hungire
OVE wa rora okuzuva okasino amake hungire? Ove mape ya o tja: ‘Kako, ovipuka kavi hungire.’ Nungwari Ombeibela i hungira ohunga nokasino ku ka hungira. Indjeye tu tare kutja ihi tja tjitwa vi.
Ovaisrael ve ri pookurongerera okuhita mehi raKanaan. Balak, ombara yaMoab, mai tira Ovaisrael. Okutja eye wa isanisa omurumendu omunazondunge wena Bileam kutja me yekusenga Ovaisrael. Balak wa raera Bileam kutja me mu pe ovimariva ovingi, okutja Bileam wa ronda kokasino ke nu wa uta ouyenda we okuyenda ku Balak.
Jehova kaa vanga kutja Bileam ma senge otjiwaṋa tje. Mena ranao eye wa hinda omuengeli ngu nengaruvyo ere ma kurame mondjira okutjaera Bileam. Bileam kaa yenene okumuna omuengeli, nungwari okasino ke aake mu munu. Okutja okasino ka kondjisa okuyepa okuzapo pomuengeli, korusenina ake rara mondjira. Bileam wa pindika tjinene, nu a utu okutona okasino ke nokati.
Okuzambo Jehova wa tjita kutja Bileam ma zuve okasino ke amake hungire kuna ye. Okasino ke mu pura: ‘Ami mba ungura tjike kove tji mo ndji tono?’
Bileam wa tja: ‘Ove we ndji munikisa ouyova, andaku mbi na engaruvyo etje ku zepa!’
Okasino ke mu pura: ‘Ami mba rora okukutumba nai rukuru?’
Bileam we ke zira: ‘Kako.’
Okuzambo Jehova wa tjita kutja Bileam ma mune omuengeli ngu nengaruvyo a kurama mondjira. Omuengeli wa tja: ‘Omena ratjike tji wa tono okasino koye? Ami mbe ya okukutjaera, mena rokutja ko sere okuyenda okukasenga Ovaisrael. Andakuzu okasino koye kake na puka tanauka okuzapo pu ami, etje ku tona okukuzepa, nungwari hi tje hihamisa okasino koye.’
Bileam wa tja: ‘Ami mba tura ondjo. Ami hee tjiwa kutja ove wa kurama mondjira.’ Omuengeli wa yandjera Bileam okuyenda, nu Bileam wa kayenda komurungu okukahakaena na Balak. Eye ngunda aa kondjisa okusenga Ovaisrael, nungwari Jehova we mu tjita kutja ma sere Israel ondaya povikando vitatu.
