Tenṭeq-ed teɣyult
TAQSIṬ TIS 42
Tenṭeq-ed teɣyult
YELLA wasmi i tesliḍ i teɣyult yeţmeslayen? Ahat a s-tiniḍ: ‘D lmuḥal! Lḥiwan ur heddṛen ara.’ Lameɛna Adlis Iqedsen ihdeṛ-ed ɣef yiwet n teɣyult i d-immeslayen. A nwali tura amek i d-yeḍra leɛǧeb-agi.
Cwiṭ kan i sen-d-yeqqimen i wat Isṛayil akken ad kecmen ɣer tmurt n Kanɛan. Balaq, agellid n Muwab, yugad At Isṛayil. Dɣa iceggeɛ ɣer wemkacef Bilɛam a d-yas, ad yefk deɛwessu i wat Isṛayil. Balaq iwɛed i Bilɛam a s-yefk aṭas n yedrimen. Ɣef waya i gerkeb Bilɛam ɣef teɣyult-is, yeṭṭef abrid akken ad iṛuḥ ɣer Balaq.
Bilɛam yeqsed ad yenɛel At Isṛayil, lameɛna Yahwa ur yebɣi ara. Dɣa iceggeɛ yiwen lmelk s ssif (isekkin) ameqran akken ad isqiṭṭeɛ abrid i Bilɛam. Bilɛam ur izmir ara ad iwali lmelk-nni, lameɛna taɣyult-is, neţţat, tezmer. Taɣyult-nni teɛreḍ akk amek ara tbeddel abrid iwakken ur teţḥaz ara lmelk-nni. Ɣer taggara, tebrek deg webrid. Bilɛam yerfa nezzeh, dɣa yebda yekkat-iţ s uɛekkaz-is.
Imiren kan Yahwa yexdem lbeṛhan. Bilɛam yesla i teɣyult-is tenṭeq-ed ɣur-es, testeqsa-t: ‘D acu i k-xedmeɣ armi iyi-tewteḍ?’
Bilɛam yerra-yas: ‘Axaṭer terwiḍ-iyi leɛqel-iw. Lemmer yelli ssif deg ufus-iw, tili a kem-nɣeɣ!’
Taɣyult-nni testeqsa-t diɣen: ‘Eɛni yella wasmi i k-xedmeɣ akka?’
Bilɛam yerra-yas: ‘Ala.’
Imiren Yahwa yeǧǧa Bilɛam ad iwali lmelk-nni ibedden di tlemmast n webrid, isekkin deg ufus-is. Lmelk-nni yenna-yas: ‘Acuɣer i tewteḍ taɣyult-ik? Usiɣ-d a k-gezmeɣ abrid axaṭer ur ilaq ara aţ-ţṛuḥeḍ aţ-ţneɛleḍ Isṛayil. Lemmer ur twexxeṛ ara teɣyult-ik, tili nɣiɣ-k, ma d neţţat menɛeɣ-ţ.’
Bilɛam yenna: ‘Denbeɣ. Ur ẓriɣ ara belli tbeddeḍ di tlemmast n webrid.’ Lmelk yeǧǧa Bilɛam ad ikemmel abrid-is, dɣa Bilɛam iṛuḥ ɣer Balaq. Iɛreḍ tikkelt nniḍen ad yenɛel At Isṛayil meɛna Yahwa ur s-iɛemmed ara. Ṛebbi yewwi-t ad ibarek agdud-is tlata tikkal.
Aneẓruf 21:21-35; 22:1-40; 23:1-30; 24:1-25.
