MA AAWABʼIHOM chi aatinak jun li bʼuur? Inkʼaʼ, peʼyaal? Xbʼaan naq ebʼ li xul inkʼaʼ nekeʼaatinak. Abʼan, li Santil Hu naxye naq jun li bʼuur kiʼaatinak. Qilaq chanru kikʼulmank aʼin.

Yook chi wulak xqʼehil naq ebʼ laj Israel teʼoq saʼ li tenamit Canaan. Abʼan laj Balac, li awabʼej re Moab, naxuwahebʼ laj Israel. Joʼkan naq, kixtaqla xsikʼbʼal laj Balaam re naq tixmaajewa ebʼ laj Israel. Laj Balaam xko rilbʼal laj Balac xbʼaan naq kiyeechiʼiik naabʼal li tumin re.

Li Jehobʼa inkʼaʼ naraj naq laj Balaam tixmaajewa li xtenamit. Joʼkan naq kixtaqla jun li anjel re naq tixram xbʼe laj Balaam. Laj Balaam inkʼaʼ kiril li anjel, abʼan li bʼuur kiril li anjel aʼin. Li bʼuur kiraj xjalbʼal xbʼe ut inkʼaʼ kiru, joʼkan naq kixbʼuchubʼ ribʼ chiru chʼochʼ. Naq li bʼuur kixbʼaanu aʼin, kʼajoʼ naq kichalk xjosqʼil laj Balaam joʼkan naq kiʼok xsakʼbʼal.

Li Jehobʼa kixbʼaanu naq laj Balaam trabʼi naq li xbʼuur kixye re: ‹Kʼaʼut naq yookat insakʼbʼal?›

Laj Balaam kichaqʼok: ‹Xaabʼaanu naq tinkanaaq saʼ xutaan, wi wank raj junaq inchʼiichʼ tatinkamsi raj!›

Tojaʼ naq kixye li bʼuur: ‹Ma ak xinbʼaanu junsutaq aawe aʼin?›

‹Inkʼaʼ!› Chan laj Balaam.

Chirix chik aʼan li Jehobʼa kixbʼaanu naq laj Balaam tril naq wank li anjel chiru. Li anjel kixye re laj Balaam: ‹Kʼaʼut naq xaasakʼ laabʼuur? Xinchalk xrambʼal laabʼe re naq inkʼaʼ taamaajewa li tenamit Israel. Wi laabʼuur inkʼaʼ raj xbʼuchubʼ ribʼ; xatinkamsi raj. Abʼan, inkʼaʼ raj xinchʼeʼ laabʼuur!›

Laj Balaam kixye re li anjel: ‹Xinmaakobʼk, inkʼaʼ ninnaw naq wankat arin!› Li anjel kixkanabʼ chi xik laj Balaam. Chirix chik aʼan, laj Balaam xko rikʼin laj Balac. Laj Balaam kixyal xmaajewankil li tenamit Israel, abʼan li Jehobʼa kixbʼaanu naq laj Balaam trosobʼtesi oxibʼ sut li xtenamit.