YU DƆN ɛva yɛri we dɔnki de tɔk? Sɔmtɛm yu go se: ‘Nɔ, animal dɛn nɔ de tɔk.’ Bɔt di Baybul tɔk bɔt wan dɔnki we tɔk. Lɛ wi si aw dis bin apin.

Di Izrɛlayt dɛn dɔn rɛdi fɔ go na Kenan. Di kiŋ na Moab we nem Belak de fred di Izrɛlayt dɛn. So i sɛn kɔl wan man we gɛt sɛns we nem Belam, fɔ kam swɛ di Izrɛlayt dɛn. Belak prɔmis fɔ gi Belam plɛnti mɔni. So Belam tek in dɔnki ɛn bigin go to Belak.

Jiova nɔ want mek Belam swɛ in pipul dɛn. So i sɛn wan enjɛl we gɛt lɔng sɔd fɔ go tinap na di rod fɔ blɔk Belam. Belam nɔ de si di enjɛl bɔt in dɔnki de si am. Di dɔnki tray nɔ fɔ go usay di enjɛl de, so i ledɔn na di rod. Dis mek Belam vɛks bad ɛn i bigin bit di dɔnki wit stik.

So Jiova mek Belam yɛri we in dɔnki de tɔk to am. Di dɔnki aks am se: ‘Wetin a dɔn du yu we mek yu de bit mi so?’

Belam se: ‘Yu dɔn mek a fiba pɔsin we ful. If a bin gɛt sɔd, a bin fɔ dɔn kil yu!’

Di dɔnki aks am se: ‘A dɔn ɛva du dis to yu?’

Belam ansa se: ‘Nɔ, yu nɔ wan de du dis to mi!’

Dɔn Jiova mek Belam si di enjɛl we tinap na di rod wit di sɔd. Di enjɛl se: ‘Wetin mek yu de bit yu dɔnki? A kam blɔk yu mek yu nɔ go swɛ di Izrɛlayt dɛn. If yu dɔnki nɔ bin fred fɔ kam nia mi, a bin fɔ dɔn kil yu. Bɔt a nɔ bin fɔ du yu dɔnki natin.’

Belam se: ‘A dɔn du bad. A nɔ bin no se yu tinap na di rod.’ Di enjɛl mek Belam pas ɛn Belam go to Belak. Belam stil tray fɔ swɛ di Izrɛlayt dɛn, bɔt Jiova mek i blɛs dɛn tri tɛm.