NGA wa wá kala ebuluku divovanga? ‘Ve, kadi e bulu ke yivovanga ko.’ Kansi, Nkand’a Nzambi uyikanga ebuluku dimosi diavova. Yambula twatala una diavangamena.

Aneyisaele bafinama kota muna nsi a Kenani. O Baraki wa ntinu a Moabe ubamwenene wonga. Ikuma, otumisi nkwa ngangu wayikilwanga vo Bilami mu siba Aneyisaele. Baraki unsididi nsilu a kumvana nzimbu zayingi. Muna kuma kiaki, o Bilami obongele ebuluku diandi wele wanana yo Baraki.

O Yave kazola ko vo Bilami kasiba nkangu Andi. Ikuma, otumini mbasi andi ye nsosolo anda. Otelamene muna nzila mu ningamesa Bilami. Bilami kamwene mbasi ko, kansi ebuluku diandi dimwene. Ebuluku divavidi venga mbasi, dibubamene vana ntoto. O Bilami ofungidi makasi, owende ebuluku yo nkau.

Yave oyambwidi vo Bilami kawa e ndinga ebuluku diandi. ‘Aweyi ivangidi muna kungwanda?’ Ukayuvula ebuluku.

Bilami ovovese ebuluku vo, ‘kadi ongeye unsakanini. Kele vo yakala ye nsosolo, nga ivondele.’

Ebuluku divovese Bilami vo, “nga i fu kiame kia kuvanga wau e?”

Bilami ovutwidi vo, “ve.”

O Yave otemwene meso ma Bilami, omwene mbasi a Yave otelamene mu nzila, ye nsosolo va koko. O Mbasi umvovese vo: ‘Mu nkia kuma owandidi ebuluku diaku? Ngizidi kusima, kadi kufwete siba Isaele ko. Kele vo kampengameni ko, nga ivondele yo vukisa ebuluku diaku.’

Bilami ovovele vo: “Nsumukini; kadi kiazaya wo ko vo untelamène omu nzila.” O mbasi oyambwidi Bilami kenda kwandi. O Bilami wele kwa Baraki. Wavava mpila ya sibila Isaele. Kansi o Yave ovilwidi e sibu kiandi se nsambu. Osambwidi Isaele nkumbu ntatu.