Chihande 42

Chimbulu Mwahanjika

WEVWAHO lyehi chimbulu mwahanjika tahi? Unahase kukana ngwove: ‘Chiku. Tunyama kavahanjikako.’ Oloze Mbimbiliya yavuluka chimbulu ahanjikile. Tutalenu muchapwile.

VaIsalele hivanalizange vengile mulifuchi lyaKanane. Mbalaka, mwangana wavaMowave, nevu woma wavaIsalele. Hikusanyika lunga wamangana, Mbalame, ezenga nakwangula vaIsalele. Mbalaka mwalishinga kufweta Mbalame jimbongo jajivulu, ngachize Mbalame hikunyina hachimbulu nakuya nakumona Mbalaka.

Yehova kasakile Mbalame angule vatu Jenyiko. Shikaho hikutuma kangelo nakwimana mujila napoko yamukwale mangana emike Mbalame. Mbalame kumona kangelo chiku, oloze chimbulu chenyi namumono. Chimbulu mwazanga akondoloke kangelo oloze kuhasa chiku, kaha ulukutu mujila. Mbalame napihilila, hikupupula chimbulu chenyi nachitondo.

Yehova hikulingisa Mbalame evwenga chimbulu chenyi mwamuhanjikila. Chimbulu himwamwihula ngwenyi: ‘Ngunakulingi ika numba unguvete ngana?’

Mbalame ngwenyi: ‘Unangusawisa. Nge ngwapwanga napoko yamukwale kachi ngunakujihi!’

Chimbulu ngwenyi: ‘Uno ngwakulingaho lyehi ngana numba?

Mbalame ngwenyi: ‘Nduma.’

Jino Yehova himwalingisa Mbalame kumona kangelo nemana mujila napoko yamukwale. Kangelo ngwenyi: ‘Wamupupwila ika chimbulu chove? Nguneza nakujika mujila yove, mwomwo kawatela uyenga nakwangula vaIsaleleko. Nge chimbulu chove kangukondolokangako, kachi ngunakujihi, nakuseza chimbulu wamutonyi.’

Mbalame ngwenyi: ‘Ngunavulumuna. Kangwatachikizanga ngwami unemana mujilako.’ Kangelo hikumusuula Mbalame, kaha Mbalame himwaya kuli Mbalaka. Mwasaka lika ashinge vaIsalele, oloze Yehova himwamulingisa akisule vaIsalele katatu.

Kulava 21:21-35; 22:1-40; 23:1-30; 24:1-25.