MPANJI 42

Chimbulu Nahoshi

WAMUTIYAHU dehi chimbulu nakuhosha? Watela kwakula neyi, ‘Inehi. Anyama hiyahoshañaku.’ Ilaña Bayibolu yahosha hadi chimbulu wahosheli. Tutalenu chichadiña.

A Isarela anadiloñeshi dehi kuya mwituña daKenani. Mwanta wakuMowabi Balaki natiyi woma wawaIsarela. Dichi hakutemesha iyala wamaana Balami kulonda ashiñi aIsarela. Balaki wamukanini Balami nindi wukumwinka mali amavulu, dichi Balami hakukandama hachimbulu chindi kulonda akadimoni naBalaki.

Yehova hanakukeña nindi Balami yoshiñi antu Jindiku. Dichi hakutemesha kañelu nampoku yakabali yayilehi nakwimana munjila kulonda kumukañesha Balami. Balami hanamumoni kañeluku, ilaña chimbulu chindi namumoni. Dichi chimbulu hichikweseka kuteñuluka nakumutemuka kañelu, nkumininaku hichikuwutama munjila. Balami hakuhila nankashi, hakweta chimbulu chindi nambwechi.

Hohenohu Yehova hakwilisha Balami atiyi chimbulu chindi hichikumuhoshela. Chimbulu hakumwihula nindi, ‘Nakwilidi mwaka wuñeti?’

Balami hakuhosha nindi, ‘Wunañilishi nimwekani neyi chisupi. Neyi nadiña nampoku yakabali chiña nakujahi!’

Chimbulu hakumwihula nindi, ‘Nakwilahu dehi chamuchidiwu?’

Balami hakwakula nindi, ‘Nehi.’

Dichi Yehova hakwilisha Balami kulonda amumoni kañelu wunemani munjila nampoku yindi yakabali. Kañelu hakuhosha nindi: ‘Wunamwetelidi chimbulu cheyi? Nenzi nakujikilila muloña wubuli kuya nakuyishiña aIsarela. Neyi chimbulu cheyi hateñuluka kumesu amiku, mutenowu nakujahi, ilaña hinadi kukatisha chimbulu cheyiku.’

Balami hakuhosha nindi: ‘Navulumuni. Hineluka nami wunemani munjilaku.’ Kañelu hakumulekaku Balami, dichi Balami hakuya nakudimona naBalaki. Wuchidi kukeñesha nindi ashiñi Isarela hohu, ilaña Yehova hakumwilisha kulonda akiswili Isarela mapampa kasatu.

Kuchinda 21:21-35; 22:1-40; 23:1-30; 24:1-25.