¿O TZʼOK tbʼiʼnxiya jun chej in yolen? ‹Mitiʼxi›, chiloye. Ax ikx jakule tqʼmaya: ‹Mitiʼ kye txkup nbʼant kyyolin›. Atzunte Tyol Dios ntzaj tqʼamaʼn qa jaw yolen jun chej. Qo xnaqʼtzal tiʼj tzeʼn ikʼe jlu.

Chʼixtl kyokx aj Israel toj txʼotxʼ te Canaán. Tzaj xobʼ Balac, aju ajkawil te Moab, kyuʼn aj Israel. Tuʼntzunjo, xi tqʼamaʼn tuʼn t-xi txokbʼaj jun xjal ajnabʼil Balaam tbʼi, tuʼntzun t-xi tqanin mya bʼaʼn kyibʼaj aj Israel. Xi tmaʼn te qa kxeltaq tqʼoʼn nim pwaq te, tuʼntzunju, jax Balaam tibʼaj tchej ex xiʼ jatumel taʼ Balac.

Nya tajteq Jehová tuʼn t-xi tqanen Balaam mya bʼaʼn tibʼaj ttnam. Tuʼntzejo, tzaj tsamaʼn jun anjel tukʼe t-espada nim tqan tuʼntzen tkubʼ weʼ tuj bʼe ex tuʼn tweʼ Balaam tuʼn. Mitiʼ til Balaam anjel, atzunte chej tlom anjel. Tajtoq te chej tuʼn tel laqʼe tiʼj anjel, tuʼnjo mitiʼ bʼent tuʼn tel laqʼeʼ kubʼ bʼuneʼ toj bʼe. Tzaj nim tqʼoj Balaam tuʼn jlu, tuʼntzunjo, ok tjubʼen tchej tukʼil jun tzeʼ.

Yoletzun chej tuʼn Jehová tuʼntzun tok tbʼiʼn Balaam. ‹¿Tiʼ ma nbʼinchaye tiʼja tuʼntzen wok tjubʼiye?› Chi chej xi tqanin.

‹In xmayina wiʼje›, xi ttzaqʼweʼn Balaam. ‹¡Noqwit at jun espada tuj nqʼabʼe, jakulo kubʼ nbʼiyoʼna!›

‹¿Ope nbʼinchaye jun maj tiʼja ik tzaʼn jlu?› Xi tqanin chej.

‹Mintiʼ›, chi Balaam.

Jaqettzun twitz Balaam tuʼn Jehová tuʼn ttil, mo tuʼn tlom aju anjel waʼltoq toj bʼe ex iqʼiʼntaq jun espada tuʼn. Xi tmaʼn anjel te: ‹Tiquʼn ma bʼaj tasyalin tcheja? Ma chin ule maqol tbʼeya, quʼn mya bʼaʼn tuʼn t-xiʼya qanil nya bʼaʼn kyibʼaj aj Israel. Naqwit mintiʼ sel tpan tibʼ tcheja wiʼje, mawtlo kyima wuʼne, atzente tcheja mitiʼwtlo xkyim›.

Xi tqʼamaʼn Balaam: ‹Ma chin bʼinchane il. Mitiʼtoq bʼiʼn wuʼne qa aya oteq kubʼ ten tuj bʼe›. Xitzen ttzaqpiʼn anjel Balaam, atzunte Balaam kukx bʼet tuʼn tpon jatumel taʼ Balac. Tajbʼilxtoq te Balaam tuʼn t-xi tqanin mya bʼaʼn kyibʼaj aj Israel, atzunte Jehová onin tuʼn tkubʼ tkʼiwlaʼn Balaam oxe maj qe aj Israel.