Kgaolo 42: Pokolo e a Bolela
NA O kile wa kwa pokolo e bolela? O ka re: ‘Aowa, diphoofolo ga di kgone go bolela.’ Eupša Beibele e re botša ka pokolo yeo e kilego ya bolela. Anke re bone kamoo seo se ilego sa direga ka gona.
Baisiraele ba be ba le kgauswi le go tsena nageng ya Kanana. Balaka kgoši ya Moaba o be a boifa Baisiraele. Ka gona o ile a romela baromiwa go yo bitša monna yo bohlale yo a bitšwago Bileama gore a tle a rogake Baisiraele. Balaka o ile a holofetša go nea Bileama tšhelete e ntši, ka go re’alo Bileama a namela pokolo ya gagwe gomme a tšea leeto la go ya go Balaka.
Jehofa o be a sa nyake gore Bileama a rogake setšhaba sa Gagwe. Ka gona a roma morongwa yo a bego a swere tšhoša e telele gore a eme tseleng gomme a thibele Bileama. Bileama o be a sa bone morongwa yoo, eupša pokolo yona e be e mmona. Ka go re’alo pokolo yeo ya leka go feta ka thoko ga morongwa gomme mafelelong ya fo kwatama tseleng. Bileama a galefa kudu gomme a itia pokolo yeo ya gagwe ka lepara.
Ke moka Jehofa a dira gore Bileama a kwe pokolo ya gagwe e mmolediša. E ile ya mmotšiša ya re: ‘Ke go dirile’ng gore o be o ntie?’
Bileama a re: ‘O ntirile lešilo. Ge nkabe ke be ke swere tšhoša, nkabe ke go bolaile!’
Pokolo ya mmotšiša ya re: ‘Na nkile ka go dira tše?’
Bileama a araba a re: “Aowa!”
Ke moka Jehofa a dira gore Bileama a bone morongwa yo a swerego tšhoša yo a bego a eme tseleng. Morongwa yoo a re: ‘Ke ka baka la’ng o iteile pokolo ye ya gago? Ke tlile go go thibela ka gobane ga se wa swanela go yo roga Baisiraele. Ge nkabe pokolo ya gago e se ya ka ya ntšhirogela, nkabe ke go bolaile, eupša yona ka se e gobatše.’
Bileama a re: ‘Ke dirile sebe. Ke be ke sa tsebe gore ke wena o bego o eme tseleng.’ Morongwa o ile a mo dumelela go feta gomme Bileama a ya go Balaka. Bileama o ile a leka go roga Baisiraele, eupša go e na le moo Jehofa a dira gore a ba šegofatše gararo.
Numeri 21:21-35; 22:1-40; 23:1-30; 24:1-25.
Dipotšišo
- Balaka e be e le mang, gomme ke ka baka la’ng a ile a romela baromiwa gore ba yo bitša Bileama?
- Ke ka baka la’ng pokolo ye ya Bileama e kwatame mo tseleng?
- Ke’ng seo Bileama a ilego a kwa pokolo ya gagwe e se bolela?
- Morongwa yo o ile a re’ng go Bileama?
- Go ile gwa direga’ng ge Bileama a be a leka go rogaka Baisiraele?
Dipotšišo tša tlaleletšo
- Bala Numeri 21:21-35.
Ke ka baka la’ng Baisiraele ba ile ba fenya Sihoni kgoši ya Baamore le Ogo kgoši ya Bashani? (Num. 21:21, 23, 33, 34)
- Bala Numeri 22:1-40.
Maikemišetšo a Bileama ka go leka go rogaka Baisiraele e be e le afe, gomme ke dithuto dife tšeo re ka ithutago tšona go se? (Num. 22:16, 17; Die. 6:16, 18; 2 Pet. 2:15; Juda 11)
- Bala Numeri 23:1-30.
Gaešita le ge Bileama a ile a bolela eka e be e le morapedi wa Jehofa, ditiro tša gagwe di ile tša bontšha bjang gore e be e se yena? (Num. 23:3, 11-14; 1 Sam. 15:22)
- Bala Numeri 24:1-25.
Pego ye ya Beibele e matlafatša bjang tumelo ya rena go phethagaleng ga morero wa Jehofa? (Num. 24:10; Jes. 54:17)
