¿LA ATAʼOM at che kchʼaw jun bʼur? ‹kraj atoʼm täj›. ‹Ri täq chiköp kechʼaw täj.› Pa ri Loqʼalaj Pixabʼ kubʼij che xchʼaw jun bʼur. Chqilampeʼ suche xbʼantaj wariʼ.

Xa jubʼiqʼ (jbʼeʼ) kraj che keʼok ri täq israelitas pa ri tinamit Canaán. Ri ajawinel rech Moab ubʼiʼ Balac sibʼalaj xuxibʼij ribʼ chike ri täq israelitas. Rumal laʼ, xutaq utzukuxik jun achi nim unojibʼäl ubʼiʼ Balaam rech kuta ri itzelal pa kiwiʼ ri israelitas. Xutzujuj nim pwäq che, rumal laʼ Balaam xaqʼan puwiʼ ri ubʼur tekʼuriʼ xbʼe che rilik ri Balac.

Jehová kraj täj che Balaam kuta itzelal puwiʼ ri Utinamit. Rumal laʼ, xutaq bʼi jun ángel rukʼ jun nim raqan chʼichʼ rech ktakʼeʼ pa ubʼe ri Balaam rech kuya ta che kqʼaxik. Balaam xkun täj xril ri ángel, tekʼuriʼ ri ubʼur xrilo. Ri bʼur xraj xanmaj chuwäch ri ángel, kʼisbʼal re xkanaj kan pa ri bʼe. Balaam sibʼalaj xpe royowal, rumal wariʼ xuchʼay rubʼur rukʼ jun cheʼ.

Tekʼuriʼ ri Jehová xubʼan che ri Balaam xuto che xchʼaw ri bʼur. ‹¿Su xinbʼan chawe che kinachʼayo?› Xchaʼ ri bʼur.

‹Xabʼan chwe che kʼot nunojibʼäl›, xchaʼ ri Balaam. ‹¡Wet kʼo jun chʼichʼ pa nuqʼabʼ, katinkamisaj!›

‹¿La nubʼanom wariʼ chawe ojer?› Xchaʼ ri bʼur.

‹Abʼanom täj›, xchaʼ Balaam.

Rumal laʼ Jehová xubʼan che Balaam kril uwäch ri ángel che kʼo jun nim raqan uchʼichʼ puqʼabʼ takʼal pa ri bʼe. Are waʼ xubʼij ri ángel: ‹¿Suche xachʼay ri abʼur? In petinäq che utzʼapixik ri bʼe rech katkun täj katbʼe che utaʼik itzelal puwiʼ ri Israel. Wet xatresaj ta ri abʼur che nuwäch, katinkamisaj, tekʼuriʼ kinbʼan ta kʼäx che ri abʼur›.

Balaam xubʼij wariʼ: ‹Xinbʼan numak. Wetaʼm täj che atkʼo pa bʼe›. Ri ángel xuya che ri Balaam xbʼek, tekʼuriʼ ri Balaam xutaqej ubʼe rukʼ Balac. Xraj chi na xuta itzelal pa kiwiʼ ri tinamit Israel, tekʼuriʼ xkun täj rumal che Jehová xubʼano che kuya tewchibʼäl oxibʼ mul puwiʼ ri Israel.