I AKARONGO ana rai koe i tetai atini i te tuatua anga? ‘Kare,’ i karanga ai koe. ‘Kare te manu e tuatua ana.’ Inara te akakite maira te Pipiria no runga i tetai atini tei tuatua ana. Ka akara taua e i akapeea teia i tupu ei.

Vaitata ua te ngati Iseraela i te papa no te aere atu ki roto i te enua o Kanaana. Kua mataku a Balaka, te ariki o Moabi i to Iseraela. No reira kua tiki aia i tetai tangata kikite ko Balaama te ingoa kia aere e taumaa i te ngati Iseraela. Kua taputou a Balaka e ka oronga aia i tetai moni maata na Balaama, no reira kua kake a Balaama ki runga i tana atini e kua aere atu i te aravei ia Balaka.

Kare a Iehova e inangaro ana ia Balaama kia taumaa i Tona iti tangata. No reira aia i tono ei i tetai angera e tana koke roangarere kia arai i te mataara i te tapu ia Balaama. Kare a Balaama e kite ana i te angera, tera ra te kite ra tana atini. No reira te atini i tauta ua ai kia uri ke mei te angera, e i te openga kua takoto ua ki runga i te mataara. Kua riri tikai a Balaama, e kua papa i tana atini ki te rakau.

I reira kua maani a Iehova ia Balaama kia akarongo i tana atini e tuatua maira. ‘Eaa taku i rave kia koe i papa mai ei koe iaku?’ i ui ei te atini.

‘Kua akariro koe iaku mei te neneva rai,’ i karanga ai a Balaama. ‘Naringa e e koke taku ka tamate au ia koe!’

‘I akapera ana ainei au ia koe i mua ana?’ i ui ei te atini.

‘Kare,’ i pau mai ei a Balaama.

I reira kua maani a Iehova ia Balaama kia kite i te angera e te koke e tu ra i runga i te mataara. Karanga mai te angera e: ‘Eaa koe i papa ei i taau atini? Aere mai au e arai i toou mataara, no te mea kare e tau kia aere koe e taumaa i to Iseraela. Naringa kare taau atini i uri ke mei iaku, kua tamateia koe e au, tera ra kare au e tamamae i taau atini.’

Karanga atu a Balaama e: ‘Kua ara au. Kare au i kite ana e te tu ra koe i runga i te mataara.’ Kua tuku te angera ia Balaama kia aere, e kua aere atu a Balaama i te aravei ia Balaka. Kua inangaro rai aia i te taumaa i to Iseraela, tera ra kua maani a Iehova iaia kia akameitaki i to Iseraela e toru taime.