LÁ NITADXAWÍÍN mbá miʼtsú mbáa burru bi̱ naʼthí ráʼ. ‹Na̱nguá›, gárata. ‹Xujkhúʼ na̱nguá ethi.› Mú náa Biblia naʼthí rí mbáa burru niʼthí. Mbuʼyáá xú káʼnii nirígá.

Gi chíʼgíʼ ma tigo̱o̱ rí israelitas matu̱ʼu̱u̱n náa ku̱ba̱ʼ ndrígóo Canaán. Balac, rey ndrígóo Moab, namíñuu kaʼñúún israelitas. Ikha jngó, nakuʼmiin xa̱bu̱ rí magun guyaʼ mbáa xa̱bu̱ bi̱ najmañuu wéñuʼ bi̱ nagumbiʼyuu Balaam mu ma̱ʼkha̱ gaʼtatsrigun israelitas. Nakudaminaʼ rí maxnúu wéñuʼ mbújkha̱a̱, ikha jngó Balaam nagrigui búrriu̱u̱ mu maʼga̱ gáʼyoo Balac.

Jeobá tsíyoo rí Balaam maʼtátsrigu náa Xuajñu. Ikha jngó, najunguanʼ mbáa ángel mu ma̱wi̱ji̱ jtu̱u̱n náa kamba̱a̱ ga̱jma̱a̱ mbá chídí aʼmbaʼ mu xániñuʼ manújngoo Balaam. Balaam na̱nguá eʼyoo ángel, mu búrriu̱u̱ ndaʼyoo. Burru naʼni rí matsingunʼ náa ángel, nda̱wa̱á nabóoʼ náa kamba̱a̱. Balaam nakiʼnáa wéñuʼ rí asndu naxnúu ga̱jma̱a̱ ixi̱.

Ikhú Jeobá naʼni rí Balaam maʼdxun rí búrriu̱u̱ naʼthúu̱n. Búrriu̱u̱ naraxi: ‹Ndiéjunʼ lá niniaʼ mu maraxnuʼ rá.›

Balaam naʼthí: ‹Natani̱ rí makujmún xóo mbáa xa̱bu̱ skágunʼ. ¡Á mu rí kaya mbá chídí, maxíña̱a̱n!›.

Ikhú naraxi búrriu̱u̱: ‹Lá niniaʼ xúgi̱ nákha ginii ráʼ.›

Balaam nariʼña: ‹Na̱nguá›.

Ikhú Jeobá naniñuʼ rí Balaam mbaʼyoo ángel rí wíji̱ náa kamba̱a̱ ga̱jma̱a̱ chídí. Ángel naʼthí: ‹Náa numuu dí niraxnáá búrriaʼ rá. Ni̱ʼkhá gárikhaʼ náa kamba̱a̱, numuu dí ragíʼmaa mi̱dxu̱ʼ gáratatsrigun xa̱bu̱ Israel. Á mu rí búrriaʼ ni̱ʼkha̱ kanuu náa ikhúúnʼ, ikhúúnʼ nixíña̱a̱n, mú nda̱a̱ rí gániuu búrriaʼ›.

Balaam eʼthí: ‹Nikieʼkunʼ. Na̱nguá ndi̱yo̱o̱ á mu rí xtiejún náa kamba̱a̱›. Ángel naniñuʼ rí Balaam maʼga̱ má xúʼko̱ mu mbaʼyoo Balac. Xóó nagíiʼ maʼtátsrigun xa̱bu̱ Israel, mu Jeobá naʼni dí maguma tsajkuráminʼ ajtsú aʼphu̱ náa xa̱bu̱ Israel.