IPUPUNITOR ijo ebe inera asingiria? Ibongokini ebe: ‘Mam. Mam itiang inerasi.’ Elimokinit oni Ebaibuli nukamunitos asigiria nabu kiner. Kaanyutu epone lo atakanunatar ngun.

Akapakina idwe luka Isirael ti alomar akwap naka Kaanan. Kokurianar Balak ekabaka loka Moab idwe luka Isirael. Aso konyarau etunganan loetemelel loanyaritai Balaam abunore aiken idwe luka Isirael. Kisumunite Balak aijaikin Balaam isirigin luipu, aso kibwanen do Balaam asigiriake, kogeu alosit aanyun Balak.

Mam Yawe ekoto Balaam aiken iketunga. Abu kijuk emalaika lo atingit ekileng lo aoja aibwo orot kanu aitikokin Balaam. Mam Balaam abu koany emalaika konye abu akesigiria koany. Abu asigiria kotamenen apaar awai kane ajai emailaka kosodi do arior kwap korot. Kinep anyunyura naka Balaam, kocar asigiria kekebela.

Kosodi do Yawe ainakin Balaam apupun akesigiria inera ka ngesi. Kingit asigiria ebe: ‘Kekonak bo eong jo ai, tape kicaracarai eong?’

Kobala Balaam aisgiria ebe: ‘Naarai kitusub eong ebang. Orai kejai eong ekileng akinika, ti kwana kaar jo!’

Kotema asigiria atiar: ‘Etapit tope eong aikonanakin ijo kwangin?’

Kobala Balaam ebe: ‘Mam’

Kosodi kitekweny Yawe akonye nuka Balaam, koany emalaika ebwoi korot otingite ekileng. Kobala emalaika ebe: ‘Kanukinyo icaracaraa akonisigiria? Alom eong aigalikin ekonirot naarai mam ibusakinit ijo alosit aiken idwe luka Isirael. Korai mam akonisigiria ibelokina awai kane ajai eong, abeit ti kwana kaara ijo, konye ketajar ijo akonisigiria.’

Kobala Balaam ebe: ‘Adiaka eong. Mam ajeni ebe ibwoi ijo korot.’ Kojalak emalaika Balaam alosit, ido kolot Balaam aanyun Balak. Kotam bobo aiken idwe luka Isirael konye kotoma kangun, koinak Yawe ngesi aisirereng idwe luka Isirael irwanauni.