YU HARIM pinis olsem wanpela donki i bin toktok? Ating bai yu tok: ‘Nogat. Ol animal i no inap toktok.’ Tasol Baibel i stori long wanpela donki i bin toktok. Orait, yumi ken stori long olsem wanem dispela samting i bin kamap.

Ol Israel i redi long i go insait long graun bilong Kenan. Balak, em king bilong Moap, em i pret long ol Israel. Olsem na em i salim tok long wanpela saveman, nem bilong em Balam, long i kam na kolim tok nogut long ol Israel. Balak i tok promis long givim planti mani long Balam, olsem na Balam i kalap long donki na em i go lukim Balak.

Jehova i no laik bai Balam i kolim tok nogut long ol manmeri bilong Em. Olsem na em i salim wanpela ensel i gat longpela bainat bilong i go sanap na pasim rot bilong Balam. Balam i no lukim dispela ensel, tasol donki bilong em i lukim. Olsem na donki i laik abrusim ensel, na bihain em i slip tasol long rot. Balam i kros nogut tru, na em i paitim donki bilong em long stik.

Nau Jehova i mekim na Balam inap harim donki bilong em i toktok long em. Donki i askim olsem: ‘Mi mekim wanem long yu na yu paitim mi?’

Balam i tok: ‘Yu mekim na mi luk olsem wanpela longlong man. Sapos mi gat bainat, mi bai kilim yu i dai.’

Donki i askim: ‘Bipo mi bin mekim kain pasin olsem long yu?’

Balam i tok: ‘Nogat.’

Nau Jehova i mekim na Balam inap lukim ensel wantaim longpela bainat i sanap i stap long rot. Ensel i tok: ‘Bilong wanem yu paitim donki bilong yu? Mi kam bilong pasim rot bilong yu, long wanem, yu no ken i go kolim tok nogut long ol Israel. Sapos donki bilong yu i no bin abrusim mi, mi bai kilim yu i dai pinis, tasol mi no inap mekim nogut long donki bilong yu.’

Balam i tok: ‘Mi mekim rong. Mi no save olsem yu sanap long rot.’ Ensel i larim Balam i go, na Balam i go lukim Balak. Em i laik kolim yet tok nogut long Israel, tasol Jehova i mekim na tripela taim em i blesim ol Israel.