AʼIYEJ 42
Kʼopoj jkojt meʼ burro
¿AYBAL awaʼiyoj kʼopojem jkojtuk burro? Yaniwan awal te maʼuke, melel te chambalametike ma xkʼopojik. Jaʼukmeto te Biblia ya yalbey skʼoplal te ay kʼopoj jkojt meʼ burro. Yame kiltik bael bin utʼil kʼot ta pasel.
Te israeletike jteb ma chapalukik yuʼun ya x-ochik bael ta skʼinal Canaán. Te ajwalil yuʼun Moab te Balac sbiile, ya xiw ta stojol te israeletike. Jaʼ yuʼun la stikun ta ikʼel jtul winik te Balaam sbiil te pʼij yuʼun te bin ya snaʼ spasele, yuʼun ya xbajtʼ sbolobtesbey skʼoplal te israeletike. Japbot bayal takʼin jich mo ta smeʼ burro te Balaam, bajtʼ yil te Balac.
Te Jehová ma skʼan te Balaam te ya sbolobtesbey skʼoplal te lum yuʼune. Jaʼ yuʼun te Jehová la stikun bael jtul chʼul abat te yichʼoj snajtʼil espada swenta yuʼun ya stejkʼan sba ta be, yuʼun jich ya smakbey sbe-a te Balaame. Te Balaam ma sta ta ilel te chʼul abate, yan te smeʼ burroe ya yil stukel. Jich te meʼ burroe, yoʼtanuk ya skʼan skʼej sba ta stojol te chʼul abate, ta patil la spajkan sba ta be. Jaʼ yuʼun ilin bayal te Balaam sok kaj smaj ta jchʼix teʼ te meʼ burroe.
Jich yuʼun, te Jehová la yakʼ yaʼiybey skʼop te smeʼ burro te Balaame. ¿Bin jpasojbat yuʼun te ya amajone? Jich jojkʼoybot yuʼun te meʼ burroe.
Jich la sjakʼ te Balaam: Yuʼun la awakʼon ta kʼexlal. ¡Te ayuk espada ta jkʼabe la jmilatix te jichuke!
¿Yuʼunbal ay jich jpasojbatix?, xchi ta sjojkʼoyel te meʼ burroe.
La sjakʼ te Balaame, maʼuk, xchi.
Ta patil, te Jehová la yakʼbey yil te Balaam te chʼul abat te stsakoj yespada ta bee. Jich la yal te chʼul abate: ¿Bin yuʼun la amaj te ameʼ burroe? Joʼon tal jmakbat te abee, yuʼun ma xbaat ta sbolobtesbeyel skʼoplal te lum Israele. Te manchuk la skʼej sba ta jtojol te ameʼ burroe, la jmilatix te jichuke, jaʼukmeto kuxul jil kuʼun stukel te ameʼ burroe.
Te Balaam jich la yal: Jtaoj jmul ma jnaʼojuk teme ayat ta bee. Te chʼul abat la stikun bael te Balaame. Te Balaam bajtʼ ta yilel te Balac. Yato skʼan sbolobtesbey skʼoplal te Israele, jaʼukmeto te Jehová la yakʼbey ta yoʼtan te Balaam te akʼa yalbey oxeb buelta yutsil skʼoplal te Israele.
Números 21:21-35; 22:1-40; 23:1-30; 24:1-25.
