HISITOLIA 42
Ko Te Asino Fafine ʼe Palalau
NEʼE kua koutou logo koa la ki he asino fafine ʼe palalau? ʼE koutou ʼui anai, ‘Kailoa, ʼe mole feala ke palalau te ʼu manu.’ Kae ʼe ʼui mai e te Tohi-Tapu neʼe palalau te asino fafine. Tou vakaʼi muʼa pe neʼe hoko feafeaʼi te meʼa ʼaia.
Kua ʼamanaki ke hū te kau Iselaelite ki te fenua ko Kanaane. Ko Palake, te hau ʼo Moape, neʼe mataku ki te kau Iselaelite. Koia neʼe ina fekauʼi te tagata fai kikite ʼaē ʼe higoa ko Palaame ke haʼu ʼo faitutuku ki te kau Iselaelite. Neʼe fakapapau age e Palake ʼe ina foaki anai kia Palaame he toe paʼaga lahi, pea neʼe heka ai ia Palaame ki tana asino fafine pea neʼe ʼalu kia Palake.
Neʼe mole loto ia Sehova ke faitutuku ia Palaame ki Tana hahaʼi. Koia neʼe ina fekauʼi ai te ʼaselo mo tana heletā loa ke ʼalu ʼo tuʼu ʼi te ala moʼo tāʼofi ʼo Palaame. Neʼe mole sio ia Palaame ki te ʼaselo, kae neʼe sio ki ai tana asino fafine. Koia neʼe faiga ai te asino fafine ke fakatafa ʼi te ʼaselo, pea ʼi tana mole feala neʼe takoto ia ʼi te ala. Neʼe ʼita ʼaupito ia Palaame, pea neʼe ina tā tana asino fafine ʼaki he koga ʼakau.
Pea neʼe faka fealagia e Sehova ke logo ia Palaame ki te palalau age ʼa tana asino fafine. Neʼe fehuʼi age e te asino fafine: ‘Koteā koa te meʼa ʼaē neʼe ʼau fai kia koe ʼaē ʼe ke tā ai ʼau?’
Neʼe ʼui fēnei e Palaame: ‘ ʼE ke gaohi ʼau ohage he vale. Kanapaula neʼe ʼi ai haku heletā ʼe ʼau matehi nei koe!’
Neʼe fehuʼi age e te asino fafine: ‘Neʼe kua ʼau gaohi feiā koa la ia koe ʼi muʼa atu?’
Pea tali age e Palaame: ‘Kailoa.’
Pea neʼe faka fealagia e Sehova ke sio ia Palaame ki te ʼaselo ʼaē ʼe tuʼu ʼi te ala mo tana heletā. Neʼe fehuʼi age e te ʼaselo: ‘He koʼe ʼe ke tā tau asino fafine? Neʼe ʼau haʼu ʼo pupunu tou ala, koteʼuhi ke ʼaua naʼa ke ʼalu ʼo faitutuku ki Iselaele. Kanapaula neʼe mole fakatafa tau asino fafine, kanaʼauala neʼe ʼau matehi koe, kae ʼe ʼau fakahāo tau asino fafine.’
Neʼe ʼui age e Palaame: ‘Kua ʼau agahala. Neʼe mole ʼau ʼiloʼi ʼe ke tuʼu ʼi te ala.’ Neʼe tuku ai e te ʼaselo ia Palaame ke ʼalu, pea neʼe ʼalu ia Palaame kia Palake. Neʼe faiga pe ke faitutuku ki Iselaele, kae neʼe fai e Sehova ke ina tapuakina tuʼa tolu ia Iselaele.