ANA pakwete pampikene bulu ali mkuŵeceta? Wawo mpaka aŵecete kuti: ‘Iyayi. Yinyama ngakomboleka kuŵeceta.’ Nambo Baibulo jikusasala ya bulu juŵaŵecete. Kwende tulole mwayatendecele.

Ayisalayeli agambile kusigala panandi kwinjila m’cilambo ca Kanani. Balaki, mwenye jwa ku Mowabu, akwajogopa Ayisalayeli. M’yoyo akum’ŵilasya mundu jwine jwakalamuka lina lyakwe Balamu kuti ayice amtume kukwalwesa Ayisalayeli. Balaki akumsalila Balamu kuti naga akutenda yeleyi cacimpa mbiya syejinji. M’yoyo Balamu akukwela bulu jwakwe nikuwutanda ulendo wakukuwonegana ni Balaki.

Yehofa ngakusaka kuti Balamu akalwese ŵandu Ŵakwe. M’yoyo akutumisya lilayika lili lijigele upanga welewu kuti lijime pamsewu, kuti limlepelekasye Balamu ulendo wakwe. Balamu ngakuliwona lilayikalyo, nambo bulu jwakwe jula akuliwona. Sambano bulujo akwendelecela kulingalinga kuliŵambala lilayikalyo, kaneko kumbesi kwakwe bulujo akugona pamsewu. Balamu atumbile mnope, ni akumputa bulujo ni simbo.

Kaneko Yehofa akutendekasya kuti Balamu apikane bulu jwakwe ali mkuŵeceta kwa jwalakwe. Bulu jula akuwusya kuti: ‘Ndesile cici kwa wawo kuti ambute?’

Balamu akuŵeceta kuti: ‘Mundendekasisye une kuwoneka mpela jwakupwambwana.’ Ningakole upanga ningam’wuleje!’

Bulu akuwusya kuti: ‘Ana pakwete pindesile yeleyi kwa wawo?’

Balamu akwanga kuti: ‘Iyayi.’

Kaneko Yehofa akutendekasya kuti Balamu aliwone lilayikalyo lili lijigele upanga, soni lili lijimi pamsewu. Lilayikalyo likuŵeceta kuti: ‘Ligongo cici mwamputaga bulu jwenu? Une yice kukuwugala litala, kuti mkajawula kukwalwesa Ayisalayeli. Bulu jwenu akaŵe kuti nganaŵambala une, ngam’wuleje mmwejo, nambo nganganinam’wulasya bulu jwenu.’

Balamu akuŵeceta kuti: ‘Ndemwisye. Nganimanyililaga kuti wawo ajimi pamsewu.’ Lilayikalyo likumkunda Balamu kwawula, Balamu akwendelecela kwawula kukuwonegana ni Balaki. Jwalakwe akulingape kwalwesa Ayisalayeli, nambo, mmalo mwakwe, Yehofa akutendekasya kuti jwalakwe ŵape Ayisalayeli majali kuwilisya katatu.