MOYSE rume ayüfuy ñi konal Kanaan mapu mew pu Israel che engün. Feymu lle feypifi: ‘Jewba, eluñmayafen ñi rumeal nome Jordan lewfü mew, tañi peafiel ti küme mapu.’ Welu Jewba feypieyew: ‘¡Feykay! ¡Wiño feypikilnge tüfa!’ ¿Kimimi chumngelu (chemu) feypieyew Jewba tüfa?

Moyse trawawfilu ti lil fütra kura, feymu rupay tüfachi dungu. Tukulpange: Moyse ka Aaron yamlafingu Jewba. Feypilafingu ta pu che Jewba tañi entuleetew ko engün ti lil fütra kura mew. Feymu lle Jewba feypieyew: ‘Eluwlayan tamu konpual Kanaan pingechi mapu mew.’

Fey mew, pichin küyen rupalu dew ñi lamum Aaron, Jewba feypifi ta Moyse: ‘Nüfinge Josue, ka puñmaniefipe mew Eleasar ti saserdote ka ti pu che engün. Üye mew rangi tati trawülechi pu che, feypifinge engün: “Josue we longko ngey”.’ Ñi chem pin Jewba ka femngechi femi Moyse, chumngechilen tüfa ti adentun mew.

Feymew Jewba feypifi ta Josue: ‘Newen ngeaymi, ka llükakilnge. Ngüyülafimi tati pu Israel che, ka tukuafimi Kanaan mapu mew tañi feypikünuelchi dungu, iñche mülean eymi emu.’

Fey wüla Jewba feypifi ta Moyse: ‘Pürange doy wechun Nebo fütra wingkul, Moab mapu mew.’ Feyti mew Moyse adkintu amulu pey doy üye püle Jordan lewfü mew, ka pey rume küme ad mapu Kanaan mapu mew. Jewba feypi: ‘Feypikünufiñ ñi eluafiel tüfachi mapu Abraam, Isaak, ka Jakob ñi pu fotüm. Eluayu tami peafiel, welu eluñmalayaeyu tami konpual feymu.’

Üye mew, wechun Nebo fütra wingkul mu lay Moyse. Niefuy kiñe pataka epu mari tripantu. Petu newen ngefuy ka petu küme nge niefuy. Müna weñangküley kom chi pu che, ka müna ngümakey Moyse mu engün. Welu ayüwküley ñi niefiel Josue tañi we longko engün.