Josue kɛra ɲɛminɛbaga kura ye
Maana 43nan
Josue kɛra ɲɛminɛbaga kura ye
MUSA tun b’a fɛ ale ni Israɛlkaw ka don ɲɔgɔn fɛ Kanan jamana na. O kosɔn, a y’a ɲini Jehova fɛ ko: ‘Jehova, a to ne ka Jurdɛn ba tigɛ, ka jamana duman ye.’ Nka, Jehova ko: ‘A ka ɲi ten. I kana o kuma fɔ ne ye tun.’ I b’a dɔn kun min na Jehova ye o fɔ wa?
Jehova y’o fɔ k’a da
ko tɛmɛnen dɔ de kan. O ko kɛra tuma min na Musa ye farakurun gosi ni bere ye. I hakili b’a la ko Musa ni Aron ma bonya da Jehova kan o ko la wa? U m’a fɔ jama ye ko Jehova de bɛ ji bɔ farakurun na. O de y’a to, Jehova y’a fɔ ko a tɛna a to u ka don Kanan jamana na.Kalo damadɔw Aron salen kɔfɛ, Jehova y’a fɔ Musa ye ko: ‘Na ni Josue ye, i k’a jɔ sarakalasebaga Eleazar ni jama ɲɛkɔrɔ. I k’a fɔ u bɛɛ ɲɛna ko Josue de ye ɲɛminɛbaga kura ye.’ Jehova y’a fɔ Musa ye cogo min na, Musa y’a kɛ o cogo la ten tigitigi. I ɲɛ bɛ o de la yan ja kan.
O kɔfɛ, Jehova y’a fɔ Josue ye ko: ‘I ka barika sɔrɔ. I kana siran. I bɛna Israɛlkaw ɲɛminɛ ka don ni u ye Kanan jamana na, ne ye o jamana min layidu ta u ye. Ne na to i fɛ.’
O bɛɛ kɔfɛ, Jehova y’a fɔ Musa ye ko a ka yɛlɛn kulu kan min tɔgɔ ye ko Nebo, Moab jamana na. K’a to o sanfɛ yen, Musa tun bɛ se ka Kanan jamana cɛɲumanba ye Jurdɛn baji kɔfɛ. Jehova ko: ‘Ne ye jamana min layidu ta ko ne bɛna o di Ibrahima, Isaka ni Yakuba bɔnsɔn ma, o jamana de filɛ nin ye. Ne b’a to i ka a ye i ɲɛ na, nka, ne tɛna a to i ka don a kɔnɔ.’
Musa sara kulu sanfɛ yen, ka a si to san 120 na. O y’a sɔrɔ fanga tun bɛ a la halisa. A ɲɛw fana tun ka ɲi. Jama ɲɛnasisira kosɛbɛ. olu kulela bawo Musa sara. Nka, u nisɔndiyara ka ɲɛminɛbaga kura sɔrɔ, n’o tun ye Josue ye.
Nɔnburuw 27:12-23; Dutɛrɔnɔmɛ 3:23-29; 31:1-8, 14-23; 32:45-52; 34:1-12.