OʼUNEESHI Moisés Canaánmüin namaa na israeliitakana. Nümaka nümüin Jeʼwaa: ‹Puuʼulaa talatai tü süchikat Jordán süpüla teʼrüin tü mma anasükat›. Nümaka Jeʼwaa: ‹¡Nnojo müin pünüiki!› ¿Pütüjaa aaʼu jamüsü maka nünüiki Jeʼwaa?

Shia sünainjee tü alatakat wanaa sümaa nütaitüin Moisés tü ipakat. Soto paaʼin nnojoluin nuʼwaajünüin Jeʼwaa nutuma Moisés otta Aarón. Nnojotsü naküjüin niain Jeʼwaa eweetiraka wüin suluʼujee tü ipakat. Makalaka nnojoluinjanain nantüin Canaánmüin.

Süchikijee ouktuin Aarón müshi Jeʼwaa nümüin Moisés: ‹Pümaa Josué eemüin Eleazar chi laülaakai napüleerua na sacerdotekana otta eemüin na israeliitakana. Püküja namüin niain Josué chi jekechikai nekiipuʼu›. Naainjaka Moisés tia, maʼaka piʼrüin suluʼu tü ayaakuaakat.

Nümaka Jeʼwaa nümüin Josué: ‹Katchin paaʼin, nnojo mmoluin pia. Nekiipuʼuinjachi pia na israeliitakana, püntirüinjana naya Canaánmüin otta eejeechi taya pümaa›.

Mapa nuluwataaka Moisés Jeʼwaa süpüla noʼotooinjachin saaʼumüin tü uuchikat Nebo, chakat Moab. Niʼraka Moisés yalejee tü mmakat Canaán. Nümaka Jeʼwaa nümüin: ‹Tüü shia tü mma taapüinjatkat namüin nüchonnii Abraham, Isaac otta Jacob. Piʼrüin neʼe shia tatuma, nnojoishi tantirüinjachin pia suluʼumüin›.

Ouktushi Moisés saaʼu tü uuchikat Nebo. 120 nuuyase ouktapa nia. Koʼuyüiya otta anayüiya nia. Aʼyalajüshii otta mojusü maʼin naaʼin na israeliitakana sutuma tia. Akatsaʼa talatüshii naya süka niain Josué nekiipuʼuin.