MAUXE xav nrog cov Yixayee mus hauv Khana-as tebchaws. Yog li ntawd, nws thiaj nug tias: ‘Yehauvas, thov cia kuv hla tus Dej Yaladee mus saib lub tebchaws uas zoo.’ Tiamsis Yehauvas hais tias: ‘Tsum kiag! Txhob hais txog qhov ko ntxiv lawm!’ Koj puas paub vim li cas Yehauvas hais li ntawd?

Twb yog thaum Mauxe ntaus phab pob zeb, Mauxe thiab Aloo nkawd tsis hwm Yehauvas. Koj puas nco qab qhov ntawd? Nkawd tsis qhia rau cov tibneeg tias Yehauvas yog tus uas ua dej tawm hauv phab pob zeb los. Twb yog vim li no Yehauvas thiaj hais tias nws yuav tsis cia nkawd mus hauv Khana-as.

Ib ntus tom qab Aloo tuag lawm, Yehauvas hais rau Mauxe tias: ‘Mus coj Yausua tuaj sawv ntawm tus pov thawj Ele-axa thiab sawv ntawm cov tibneeg hauv ntej. Thiab qhia rau sawvdaws tias Yausua yog tus thawj coj tshiab.’ Mauxe ua raws nraim li Yehauvas hais, zoo li koj pom hauv daim duab no.

Ces Yehauvas hais rau Yausua tias: ‘Sawv khov kho, tsis txhob ntshai li. Koj yuav coj cov Yixayee mus rau hauv lub tebchaws Khana-as uas kuv cog tseg rau lawv, thiab kuv yuav nrog nraim koj.’

Tom qab ntawd, Yehauvas hais kom Mauxe nce mus puag saum lub Roob Nenpau uas nyob hauv Mau-a tebchaws. Nyob saum lub roob ntawd, Mauxe ntsia mus pom tus Dej Yaladee thiab pom lub tebchaws Khana-as uas zoo zoo nkauj. Yehauvas hais tias: ‘Lub tebchaws no yog lub uas kuv cog tseg tias yuav muab rau Aplahas, Yiha thiab Yakhauj cov menyuam. Kuv cia koj pom lub tebchaws, tiamsis kuv tsis pub koj mus hauv lub tebchaws.’

Mauxe tuag rau saum lub Roob Nenpau. Thaum Mauxe tuag nws muaj 120 xyoo. Nws tseem muaj zog, thiab nws qhov muag tseem pom kev zoo. Cov tibneeg nyuaj siab thiab quaj vim Mauxe tuag lawm. Tiamsis lawv zoo siab tias Yausua ua lawv tus thawj coj tshiab.