MOSE ia ura Israela taudia danu Kanana tanona dekenai ia vareai. Unai dainai ia henanadai: ‘Iehova, lau ura Ioridane Sinavai lau hanaia bona unai tano namona lau itaia.’ To Iehova ia gwau: ‘Vadaeni! Inai hereva oi gwauraia lou lasi!’ Iehova be unai bamona ia hereva ena badina oi diba, a?

Mose ese nadi ia botaia neganai, ia gwauraia herevana dainai. Laloatao, ia bona Arona be Iehova idia hanamoa lasi. Taunimanima idia hamaoroa lasi nadi amo ia mai ranuna be Iehova ese ia henia. Unai badina dainai Iehova ia ura lasi Kanana tano dekenai idia vareai.

Unai dainai Arona ia mase bona hua haida murinai, Iehova ese Mose ia hamaoroa: ‘Iosua oi hakaua mai. Hahelaga tauna Eleasara bona taunimanima vairanai do ia gini. Bona oi hamaorodia, Iosua be hakaua tauna matamatana.’ Mose ese Iehova ena hereva ia badinaia, laulau dekenai oi itaia bamona.

Bena Iehova ese Iosua ia hamaoroa: ‘Oi goada, bona oi gari lasi. Oi ese Israela taudia be lau gwauhamatalaia tano Kanana dekenai do oi hakaudia lao, bona oi do lau bamoa.’

Gabeai, Iehova ese Mose ia hamaoroa, Moaba tanona ai ia noho Nebo Ororona ena ataiai momokani dekenai do ia daekau. Unuseni amo Mose ese ena matana ia negea lao Ioridane Sinavaina ena kahana dekenai bona Kanana tano mai hairaina ia itaia diba. Iehova ia gwau: ‘Lau gwauhamata Aberahamo, Isako, bona Iakobo edia natudia dekenai inai tano do lau henia. Oi itaia vadaeni, to oi vareai diba lasi.’

Unuseniai, Nebo Ororona ataiai Mose ia mase. Iena mauri lagani be 120. Ia be do goada bona ia itaia namonamo diba. Mose ia mase dainai taunimanima idia lalohisihisi bona idia taitai. To idia moale badina Iosua be edia hakaua tauna matamatana.