Josua ma rire omunane
EHUNGI 43
Josua ma rire omunane
MOSES aa vanga okuyenda ku Kanaan puna Ovaisrael. Mena ranao eye wa pura a tja: ‘Jehova ndji yandjera mbi konde onḓonḓu yaJordan nu mbi kamune ehi ewa.’ Nungwari Jehova wa tja: ‘Nga rire opuwo! O tamuna otjiṋa hi rukwao!’ Ove mo tjiwa kutja omena ratjike Jehova tja hungira nao?
Omena rotjiṋa tji tja tjitwa indu Moses tja tona oruuwa. Zemburuka kutja eye na Aaron kave hivirikire Jehova. Owo kave raerere otjiwaṋa kutja oJehova ngwa pitisa omeva okuza moruuwa. Mena rotjiṋa hi Jehova we ve raera kutja kena ku ve yandjera okuhita mu Kanaan.
Omieze katjondumba kombunda yaAaron tja ṱa, Jehova wa raera Moses: ‘Toora Josua, nu u mu kuramise komurungu womupristeri Eleasar notjiwaṋa. Nu imbo komurungu wawo avehe, ve raera kutja Josua ongu ri omunane omupe.’ Moses wa tjita otja Jehova pa hungira, otja tji mo munu motjiperendero.
Okuzambo Jehova wa raera Josua: ‘Kara nomasa nu o tira. Ove mo hongorere Ovaisrael okuhita mehi raKanaan ami ndi mbe ve kwizikira, nu ami me kara puna ove.’
Kombunda Jehova wa raera Moses okukaronda kondomba yondundu Nebo mehi raMoab. Okuza kombanda ngo Moses aa yenene okutara munda mbwina wonḓonḓu yaJordan na munu ehi ewa raKanaan. Jehova wa tja:‘Ehi ndi ondi mba kwizikira okuyandja kovanatje vaAbraham, na Isak na Jakob. Ami mbe ku yandjere okurimuna nungwari hi nakukuyandjera okuhita mu ro.’
Ingo kombanda yondundu Nebo Moses oka ṱira. Eye wa ri nozombura 120. Eye ngunda wa ri nomasa, nu omeho we aaye munu nawa wina. Otjiwaṋa tja ṱoruhoze tjinene nu tja rira mena ronḓiro yaMoses. Nungwari owo va ri nonyuṋe Josua tja rira omunane wawo.
Numeri 27:12-23; Deuteronomium 3:23-29; 31:1-8, 14-23; 32:45-52; 34:1-12.
