TAQSIṬ TIS 43

Yacuɛa, amwellah n wegdud

MUSA yebɣa ad yeddu neţţa d wat Isṛayil ɣer tmurt n Kanɛan. Yessuter ihi i Ṛebbi: ‘A Yahwa eǧǧ-​iyi ad ɛeddiɣ agemmaḍ n wasif n Uṛdun iwakken ad waliɣ tamurt-​agi yelhan.’ Lameɛna, Yahwa yerra-​yas: ‘Beṛka tura! Ur ţţuɣal ara a yi-​d-​thedṛeḍ ɣef temsalt-​agi!’ Teẓriḍ ayɣer i s-​yenna Yahwa ayagi?

Ɣef ddemma n wayen yeḍran asmi i iwet Musa aẓru-​nni. Tecfiḍ? Neţţa d Haṛun ur ḥmiden ara Yahwa. Ur nnin ara i wegdud belli d Yahwa i d-​yessufɣen aman seg weẓru-​nni. Ɣef wannect-​a i sen-​yenna Yahwa belli ur keččmen ara ɣer tmurt n Kanɛan.

Mi ɛeddan kra n wagguren mbeɛd lmut n Haṛun, Yahwa yenna i Musa: ‘Ddem Yacuɛa, sbedd-​it zdat n lmuqeddem Ilɛaẓar d wegdud. Imiren, zdat-​sen meṛṛa, ini i yal yiwen belli d Yacuɛa ara yilin ssya d asawen d amwellah n wegdud.’ Musa yexdem swaswa ayen i s-​yenna Yahwa, akken i teţwaliḍ di ţţeswiṛa-​ya.

Umbeɛd Yahwa yenna i Yacuɛa: ‘Sseǧhed iman-​ik, ur ţţagad ara. D kečč ara yawin At Isṛayil ɣer tmurt n Kanɛan i sen-​weɛdeɣ, ma d nekk ad iliɣ yid-​ek.’

Iɛedda kra n lweqt, Yahwa yenna i Musa ad yali ɣer yiwen wedrar yeţţusemman Nabu, yellan di tmurt n Muwab. Seg yixef n wedrar-​agi, Musa yerfed allen-​is, iwala nnig wasif n Uṛdun belli tamurt n Kanɛan tecbeḥ nezzeh. Yahwa yenna: ‘Ţ-​ţagi i ţ-​ţamurt i weɛdeɣ i tarwa n Abṛaham, n Isḥaq d Yeɛqub. Ɛemmdeɣ-​ak a ţ-​twaliḍ, meɛna ur ţ-​tkeččmeḍ ara.’

Ɣef yixef n wedrar-​agi Nabu i gemmut Musa. Yesɛa imiren 120 iseggasen di leɛmeṛ-​is. Ur teɣli tezmert-​is, ur yenqis yeẓri-​s. At Isṛayil ḥeznen aṭas, ţrun imi yemmut Musa. Lameɛna feṛḥen imi sɛan Yacuɛa d aqerru ajdid fell-​asen.

Aneẓruf 27:12-23; Asmekti 3:23-29; 31:1-8, 14-23; 32:45-52; 34:1-12.