Ngewa ya 43: Yoshua Aitw’ĩka Mũtongoi
MOSE nĩwendaa kũlika nthĩ ya Kanaani vamwe na Aisilaeli. Kwoou esuvana ayasya: ‘Ndeka nĩinge Ũsĩ wa Yolotani, nĩngũkwĩsũva, Yeova, none nthĩ ĩsu nzeo.’ Ĩndĩ Yeova asya: ‘Ĩanĩwa nũu! Ndũkaneene nakwa ĩngĩ ũvoo ũsu!’ We nĩwĩsĩ Yeova aisye ũu nĩkĩ?
Kĩtumi nũndũ wa ũndũ kweekĩkie yĩla Mose wakũnie ĩvia. Lilikana kana, we na Aluni mayaamũtaĩa Yeova. Mayaatavya andũ kana Yeova nĩwe waumisye kĩw’ũ ĩvianĩ. Kwa kĩtumi kĩu Yeova asya ndakamaeka malike nthĩ ya Kanaani.
Kwoou myei o mĩnini ĩtina wa Aluni kũkw’a Yeova eea Mose ũũ: ‘Osa Yosua, na ũimũũngamya mbee wa mũthembi Eleasali na mbee wa ũmbano w’onthe. Na vau mbee woo onthe, tavya kĩla mũndũ kana Yosua nĩwe mũtongoi mweũ.’ Mose nĩweekie kwĩanana na ũndũ Yeova waisye, o tondũ ũtonya kwona vaa visanĩ.
Nake Yeova eea Yosua: ‘Ĩthĩwa na vinya na ndũkakĩe. Nũndũ nue ũkamalikya Aisilaeli nthĩ ya Kanaani ĩla namevĩtĩie, nakwa ngeethĩwa vamwe naku.’
Na ĩtina Yeova eea Mose nĩambate ĩũlũ Kĩĩmanĩ kya Nevo kĩla kĩ nthĩ ya Moavi. Kuma vau ĩũlũ Mose nĩwaĩ atonya kũsisya mũingo wa Ũsĩ wa Yolotani na kwona nthĩ mbanake ya Kanaani. Na Yeova amwĩa: ‘Ĩno nĩyo nthĩ ĩla neeĩavie kana ngamĩnenga syana sya Avalaamu, Isaka, na Yakovo. Nĩnakwony’a ũmyone na metho maku ĩndĩ, ndikũeka ũlike kw’o.’
Mose akw’ĩĩie vau ĩũlũ Kĩĩmanĩ kya Nevo. Aĩ na ũkũũ wa myaka 120. Aĩ o na vinya, na metho make matyaĩ na mbindu. Andũ nĩmaũũyie mũno na maĩa nũndũ wa kĩkw’ũ kya Mose. Ĩndĩ maĩ na ũtanu nĩkwĩthĩwa na Yosua ta mũtongoi woo mweũ.
Motalo 27:12-23; Kũtũngĩlĩlya Kwa Mĩao 3:23-29; 31:1-8, 14-23; 32:45-52; 34:1-12.
Makũlyo
- Vaa visanĩ, andũ aa maũngamĩte na Mose naaũ?
- Yeova eeie Yosua ata?
- Mose alĩsile Kĩĩmanĩ kya Nevo ĩũlũ nĩkĩ, na Yeova amwĩie ata?
- Mose aĩ na ũkũũ mwaũ aikw’a?
- Nĩkĩ andũ maĩ na kĩũũyũ, ĩndĩ maĩ na kĩtumi kyaũ kya kw’ĩthĩwa na ũtanu?
Makũlyo ma kwongeleela
- Soma Motalo 27:12-23.
Nĩ wĩa mwaũ mũito Yosua wanengiwe nĩ Yeova, na ũsũvĩi wa Yeova kwa andũ make wonanaw’a ata ũmũnthĩ? (Mot. 27:15-19; Meko 20:28; Aevl. 13:7)
- Soma Kũtũngĩlĩlwa Kwa Miao 3:23-29.
Nĩkĩ Yeova ũtaaĩtĩkĩlya Mose na Aluni kũlika nthĩ ya watho, na nĩ ĩsomo yaũ tũtonya kwĩmanyĩsya kuma ũndũnĩ ũsu? (Kũt. 3:25-27; Mot. 20:12, 13)
- Soma Kũtũngĩlĩlwa Kwa Mĩao 31:1-8, 14-23.
Ndeto sya Mose sya kũtiana na Aisilaeli syĩonany’a ata kana nĩweetĩkĩlile kwa wĩnyivyo ũsilĩlo wa Yeova? (Kũt. 31:6-8, 23)
- Soma Kũtũngĩlĩlwa Kwa Mĩao 32:45-52.
Ndeto ya Ngai yaĩlĩte kũalyũla mathayũ maitũ kwa nzĩa myaũ? (Kũt. 32:47; Ali. 18:5; Aevl. 4:12)
- Soma Kũtũngĩlĩlwa Kwa Mĩao 34:1-12.
O na kau Mose ndaaona Yeova mwene na metho, ĩandĩko ya Kũtũngĩlĩlwa Kwa Mĩao 34:10 yĩonany’a ata ĩũlũ wa mũamba wake na Yeova? (Kuma 33:11, 20; Mot. 12:8)
