MUSA nĩarenda gũtonya Kanaani hamwe na Aisiraeli. Aamwĩrire atĩrĩ: ‘Jehova ndagũthaitha ũreke nginye kuo, ngeonere bũrũri ũcio mwega wĩ mũrĩmo ũrĩa wa Jorodani.’ Jehova akiuga ũũ: ‘Reke ũhoro ũcio ũkũigane! Menya ũcoke kũnjarĩria ndeto icio!’ Nĩ ũũĩ kĩrĩa gĩatũmire Jehova oige ũguo?

Nĩ ũndũ wa ũrĩa gwekĩkire rĩrĩa Musa aagũthire rũaro rwa ihiga. Ta ririkana, atĩ we na Haruni matiatĩithirie Jehova. Matierire andũ atĩ Jehova nĩwe wamaheire maĩ kuuma rũaro-inĩ rũa ihiga. Nĩ ũndũ wa gĩtũmi kĩu Jehova akiuga atĩ ndangĩetĩkĩririe matonye Kanaani.

Thutha wa mĩeri mĩnyinyi Haruni arĩkĩtie gũkua, Jehova akĩĩra Musa ũũ: ‘Wĩyoere Joshua, ũmũige mbere ya Eleazaru mũthĩnjĩri-Ngai o na mbere ya kĩrĩndĩ gĩothe. Andũ othe makĩonaga, mere Joshua nĩwe mũtongoria.’ Ta ũrĩa ũkuona mbica-inĩ, Musa eekire o ũrĩa Jehova aamwathire.

Rĩu Jehova akĩĩra Joshua: ‘Gĩa na hinya, na ũũmĩrĩrie. Nĩ gũkorũo nĩwe ũgakinyia ciana cia Isiraeli bũrũri wa Kanaani, ũrĩa ndaamerĩire, na nĩngũikara hamwe nawe.’

Thutha ũcio Jehova akĩĩra Musa ahaice Kĩrĩma kĩa Nebo igũrũ kĩrĩa kĩrĩ bũrũri wa Amoabi. Kuuma hau gacũmbĩrĩ, Musa nĩangĩacũthĩrĩirie mũrĩmo ũũrĩa wa rũũĩ rũa Jorodani na eyonere bũrũri ũcio mwega wa Kanaani. Jehova akiuga ũũ: ‘Ũyũ nĩguo bũrũri ũrĩa nderĩire ciana cia Iburahimu, Isaaka, na Jakubu. Kuona nĩũkona, no rĩrĩ gũtonya ndũgatonya.’

Kũu Kĩrĩma igũrũ kĩa Nebo Musa agĩkua. Aarĩ na mĩaka 120. Ningĩ aarĩ na hinya, o na maitho matiorĩte. Akua andũ makĩnyitwo nĩ kĩeha na makĩmũrĩrĩra. No ningĩ nĩmaakenire nĩũndũ wa Joshua gũtuĩka mũtongoria wao mwerũ.