MOSESA wakebele kuya mu Kenana pamo na bena Isalela. O ene mambo o aipwizhizhe’mba: ‘Anweba Yehoba, mwane banswishe kwabuka, nkamone kyalo kyawama kiji ku bushiya bwa Mukola wa Yodano.’ Pakuba Yehoba waambile’mba: “Wikileketu byonkabyo, kechi uñambile jibiji pa kino kintu ne.” Nanchi wayuka kyalengejile Yehoba kwamba bino nyi?

Ke na mambo a kyamwekele Mosesa byo apumine mu jibwe. Vuluka kuba’mba, Mosesa ne Alona bakankelwe kutumbijika Yehoba. Kechi baambijile bantu amba Yehoba ye usakwimupa mema kufuma mu jibwe ne. Na mambo a kino, Yehoba waambile’mba kechi bakatwela mu Kenana ne.

Byo papichile bañondo bacheche kufuma pafwijile Alona, Yehoba waambijile Mosesa amba: ‘Twala Yoshua, umwimike ku meso a Eleaza ñanga ne ku meso a jibumba jonse, ne kumulaya ku meso abo amba ye ntangi wasalwa katataka.’ Mosesa waubijile monka mwaambijile Yehoba, byonka byo wamona pa kikye kipikichala.

Kepo Yehoba amwambijile Yoshua amba: ‘Kosa ne kuchinchika mambo ukaya nabo bano bena Isalela mu kyalo kya Kenana kyo nebalayile, kabiji nkekala ne obewa.’

Palutwe kacheche Yehoba wamwambijile Mosesa kukanjila peulu ya Mutumba wa Nebo mu kyalo kya Moabu. Byo akanjijile wamwene kubushiya bwa Mukola wa Yodano ntanda yawama ya Kenana. Ponkapo Yehoba waambile’mba: ‘Kino kyo kyalo kyo nalayile kupana ku baana ba kwa Abalahama, Izaka, ne Yakoba. Nakuleka namba wikimone, bino kechi ukatwelamo ne.’

Mosesa wakafwijile ponka pa Mutumba wa Nebo. Wafwile na myaka 120. Wafwiletu saka akosa, ne meso anji saka ajitu bulongo. Bantu baumvwine bingi bulanda ne kujila bajijile na mambo a kufwa kwa Mosesa. Bino batemenwe bingi pa kwikala ne Yoshua ntangi wabo wakatataka.