MUUSE ndoo yeema le kɔlaŋ a Isɔluɛitiiya Kenaŋ. Le hei, mbo dimul Jɛhowa aa: ‘Yandii, I taŋ ndɔɔ Pee Chɔɔdaŋndo hoo mi che lɛŋnde kɛndɛleŋ ndeŋ.’ Kɛ mi Jɛhowa dimi aa: ‘O cho letuu! Kamaa tuu lɛ bɛɛ pɛŋ te!’ A sina pa le nyɛ Jɛhowa dimi lende wo?

Le nyɛ yɔŋnuŋ teleŋ Muuse boŋa pouvo wo. Loonuŋ maa Muuse nda Eelɔŋ ndaa saŋgala Jɛhowa le. Kanifuule a tosa mi waŋnda sina maa Jɛhowa kpeekpei le soli mɛŋndaŋ o pouvo le. Le saboo hoo Jɛhowa dimul nda ni maa a kue o lɛŋnde Kenaŋndeŋ niŋ te.

Mɛɛ paŋgoŋ hiou ŋtiŋ o piɔm Eelɔŋndo kɔɔli, mi Jɛhowa dimul Muuse aa: ‘Simi Chɔɔsuaa waŋnda lachi vɛlɛa Eliyesa, wana ni soliaa salaa. Nduyɛ, ma dimul nda loŋ kpou maa Chɔɔsuaa cho niŋ simlachinɔ sɛnɛiyo ni.’ Mi Muuse tosa mɛɛ mɛɛ Jɛhowa dimul ndu yɛ, a mɛɛ ŋ cho naa chɔɔ o fotueiyo hoo niŋ yɛ koni.

Okoŋ mi Jɛhowa dimul Chɔɔsuaa aa: ‘Wa a isiooŋ te, sim o kala kpiŋ. A cho lakɔ a Isɔluɛitiiya o lɛŋnde Kenaŋndeŋ niŋ dika le ya dimi le nda kio leŋ, nduyɛ I cho wa a num latulu.’

Mɛɛ nyɔɔ viou kpɛɛ, mi Jɛhowa dimul Muuse le mbo hel o pembii Nibo ve bolleŋ tema o lɛŋnde Moabileŋ niŋ. Loŋ Muuse lo ni mbo mɛɛndaŋ kɔɔli kɔɔli o Pioo Chɔɔdaŋ leloo. Nduyɛ, loŋ o lo ni mbo cha lɛŋnde Kenaŋnde kɛndɛle leŋ. Mi Jɛhowa dimi aa: ‘Lɛŋndeŋ ya dimi le chuaa mamaa Ebilahamnda, Aisaki a Chekɔpuaa kio ni. I chɛl num ma cha leŋ, kɛ a cho lakɔ leniŋ te.’

O Pembii Nibo ve choo loŋ Muuse lo ni mbo wu. Wu ndɔɔ o wa wɔsilaŋ 120. O waŋnuŋndɔ kpeŋkpeleŋ, nduyɛ mi ndoo che wɔ walaŋ. Mi waŋnda bii mɔnɛi, nduyɛ ma chaŋ le piɔm Muusioo tau. Kɛ ma naŋ vɛlɛ kɔl le mɛɛ nda sɔla Chɔɔsuaa maa simlachinɔ nda sɛnɛiyo yɛ.