Esimwititi 43: Josuwa ta kara mupitisili
MOSESA ana hara kuza moKanani noVaisraeli. Ta pura asi: ‘Ko sigi nge si Jehova, ni rute mukuro gwaJorodana ni ka mone sirongo sosiwa.’ Nye Jehova ta tanta asi: ‘Makura! Wa ha rugwira mo hena kuuyunga name yininke eyi!’ Ono diva asi morwasinke Jehova ga uyungilire eyi?
Morwa yeeyi ya horokere apa Mosesa ga toonene pemanya. Diworoka, age naArona kapi va fumadekere Jehova. Awo kapi va tanterere vantu asi Jehova yige ga pwagesere mema memanya. Morwa konda ezi Jehova yipo ga tente asi kapi nga va ninka va ze moKanani.
Makwedi gongandi konyima zonomfa daArona, Jehova ta tantere Mosesa asi: ‘Gusa Josuwa o mu sikameke komeho zomupristeli Eliyasara nokomeho zovantu. Ano moyitarameho yanavenye, va tantera navenye asi Josuwa yige mupitisili gomupe.’ Mosesa ta rugana yeeyi ga tente Jehova, ngomu ono kuyimona mefano.
Jehova makura ta tantere Josuwa asi: ‘Kara nononkondo, ntani wa ha tjira. Ove ngo pitisira Vaisraeli va ze mosirongo saKanani esi na va tumbwidira, ano ame ngani kara nove.’
Konyima Jehova ta tantere Mosesa a ronde dogoro kondungu zondundu zaNebo mosirongo saMowaba. Keguru kwina Mosesa ta tara mesinya mwina lyomukuro gwaJorodana nokumona sirongo saKanani sosifuuli. Jehova ta tanta asi: ‘Esi yiso sirongo esi na tumbwidira kupa vana vaAbirahamu naIsaka naJakopo. Ame nina si ku likida, nye kapi nani ku ninka o ze mo.’
Keguru lyondundu zina zaNebo Mosesa ta fu. Age kwa kere nonomvhura 120. Age kwa kere simpe nononkondo, ano meho gendi simpe kwa kere mawaawa. Vantu tava guwu unene oku tava lili morwa nomfa daMosesa. Nye awo vana hafa mokukara naJosuwa ngomupitisili gwawo gomupe.
Numeri 27:12-23; Deuteronomium 3:23-29; 31:1-8, 14-23; 32:45-52; 34:1-12.
Mapuro
- Mefano, wolye owo vagara vavali vana sikama kumwe naMosesa?
- Yinke ana kutantera Jehova Josuwa?
- Morwasinke ana kurondera Mosesa keguru lyondundu zaNebo, ntani yinke ana mu tantere Jehova?
- Nomvhura daMosesa dingapi da kara apa ana fu?
- Morwasinke vana guvire vantu, nye konda musinke nava hafera?
Mapuro gokugwederera ko
- Resa Numeri 27:12-23.
Sirugana musinke sosinene ga gwene Josuwa kwaJehova, ntani ngapi omu ana kulikida Jehova epakero mbili kovantu vendi naina?
- Resa Deuteronomium 3:23-29.
Morwasinke ga dilire kupulisira Jehova oMosesa naArona va ze mosirongo setumbwidiro, ntani yinke natu vhura kulirongera ko kweyi?
- Resa Deuteronomium 31:1-8, 14-23.
Nonkango dokuhulilira daMosesa koIsraeli, ngapi omu da likidire asi age ga tambwire nelinunupiko episuro lyokutunda kwaJehova?
- Resa Deuteronomium 32:45-52.
Ngapi omu nadi kundama Nonkango daKarunga nomwenyo detu?
- Resa Deuteronomium 34:1-12.
Nampili ngomu Mosesa kapi ga mwene nawa-nawa Jehova, yinke azi likida Deuteronomium 34:10 kuhamena elikwatakano lyendi kumwe naJehova?
