MOSE ozolele kota muna nsi a Kenani yo Aneyisaele. Olombele kwa Nzambi vo: ‘E Yave yambula yasauka Nkoko a Yodani yamona nsi ambote.’ O Yave umvovese vo: “Sia wowo; kungikila diaka diambu diodio ko.” Ng’ozeye ekuma Yave kavovela e mpila yayi?

Mu kuma kia dina diavangama vava Mose kawanda etadi. Sungamena vo yandi yo Arone ke bakembesa Yave ko. Ke bavova kwa nkangu ko vo Yave ovaikisa maza mun’etadi. Muna kuma kiaki, o Yave wavova vo ke kubayambula ko bakota muna nsi a Kenani.

Ozevo, vioka fikolo tuka kiafwila Arone, Yave ovovese Mose vo: ‘Bonga Yosua wantelamesa vana vena Elaza wa nganga yo nkangu. Vova kwa yau awonso vo o Yosua i mfidi ampa.’ O Mose ovangidi una kankanikina o Yave nze una omwene muna fwaniswa kiaki.

O Yave ovovese Yosua vo: ‘Kumama, kumoni wonga ko. Ofila Aneyisaele yamuna nsi a Kenani yina yabasila o nsilu, nkala yaku.’

I bosi, Yave ovovese Mose katomboka kuna ntandu a Mongo a Nebo muna nsi a Moabe. Vana ntandu a mongo o Mose omwene esimu dia Nkoko a Yodani yo mona nsi ambote a Kenani. Yave umvovese vo: ‘Eyayi i nsi ina yadila wan’a Abarayama e ndofi, Isaki yo Yakobo, ya kubavana yo. Isongele yo, kansi kukota mo ko.’

O Mose ofwidi vana ntandu a Mongo a Nebo. Mvu 120 kakala. Ngolo zandi ke zamana ko ngatu fwa o meso. Nkangu ukendalele yo didila Mose. Kansi, bayangalel’o kala yo Yosua wa mfidi au ampa.