Icisimicisyo 43: Josyua Aba Intangisi
MOSE alukufwaya ukuya mu Kanani pamo ne baIsilaeli. Popele alomba ati: ‘Nsuminisyeni ngabuke Inika ya Jodeni, baYehoba, kabili mbone icalo iciweme.’ Pano baYehoba balabila ati: ‘Fyafule’fi walabila! Wilabilapo libili ifya cebo ico!’ Kani waisiba umulandu baYehoba balabiliile’fyo?
Ni pa mulandu wa fyacitikile ili Mose apamine mu cibwe. Anuka ukweba’ti ye na Aloni tabapelepo baYehoba ubuleme. Tababulilepo abantu ati baali ni baYehoba e balukufumya amenda mu cibwe. Pa mulandu wenko’yu baYehoba balilabile ati tekuti babasuminisye ukuya mu Kanani.
Popele ili papita imyensi inini apo Aloni afwila, baYehoba babula Mose ati: ‘Pinta Josyua, kabili umwimakanike pa menso akwe Eliasa umupapatilisi na pa bantu. Kabili apo pa menso abonse, ubabule bonse ati Josyua e ntangisi ya bukumo.’ Mose acita fyopele’fyo baYehoba bamubula, koti nifyefyo wabona mu cikope.
Eli baYehoba baeba Josyua ati: ‘Ube ne makosa, kabili witiina. Webo ukabatangilila abaIsilaeli ukuya mu calo ca Kanani ici mbalaile, kabili nkaba na webo.’
Ili papite’mpindi baYehoba baeba Mose ukunina peulu pa Lupili lwa Nebo mu calo ca Moabi. Ukufuma peulu apo Mose angabona bwisilya bwa Nika ya Jodeni ne kubona icalo ca Kanani icakuti ubune. BaYehoba balabila ati: ‘Ici ecalo ici nalaile ukupela abana bakwe Ablaamu, Isaci na Yakobi. Nakuleka webo ukucibona, pano nsyakulekepo webo ukwingilamo.’
Penka palya peulu lya Lupili lwa Nebo Mose afwa. Aali ne myaka 120. Aali acili ne makosa, kabili ne menso akwe takwetepo akafinsi. Abantu babombomana makosa kabili balila pakuti Mose afwa. Pano basangalala pa kukwata Josyua ukuba intangisi yabo iya bukumo.
Ifyakupenda 27:12-23; Ndutelonomi 3:23-29; 31:1-8, 14-23; 32:45-52; 34:1-12.
Ifyakwipusya
- Mu cikope, nibani abo abalalume bobilo abemakene pamo na Mose?
- Mba nifindo baYehoba babula Josyua?
- Mba nindo Mose aninina peulu pa Lupili lwa Nebo, kabili findo baYehoba balabila kuli ye?
- Mose ali ne myaka inga ili afwa?
- Mba nindo abantu babombomanina, pano nipali wisa mulandu belelwe ukuba abasangalele?
Ifyakwipusya na fimbi
- Pendeni Ifyakupenda 27:12-23.
Mba niwisa mulimo ucindeme Josyua apokelele ukufuma kuli baYehoba, kabili muli bulelo ubulamisi bwa baYehoba ku bantu Babo bulabonekela kundo? (Pen. 27:15-19; Cit. 20:28; Ebeya. 13:7)
- Pendeni Ndutelonomi 3:23-29.
Mba nindo baYehoba tabasuminisye ati Mose na Aloni babuke ukuya mu calo ca bulayo, kabili cindo tungasambililako kuli cici? (Ndute. 3:25-27; Pen. 20:12, 13)
- Pendeni Ndutelonomi 31:1-8, 14-23.
Kani amasiwi Mose alabile ku baIsilaeli ili aali apepi ne kufwa alalanga syani ati alipokelele ukufundwa ukwafumine kuli baYehoba? (Ndute. 31:6-8, 23)
- Pendeni Ndutelonomi 32:45-52.
Kani Amasiwi abaLesa alyelelwe ukutulenga ukuba syani? (Ndute. 32:47; Lef. 18:5; Ebeya. 4:12)
- Pendeni Ndutelonomi 34:1-12.
Nangaba’ti Mose taababwenepo baYehoba abene ne menso akwe neli panini, findo Ndutelonomi 34:10 ilangisya pa lwa bucibusa bwakwe na baYehoba? (Fum. 33:11, 20; Pen. 12:8)
