Chihande 43

Yoshuwa Mwapwa Mwangana

MOSE mwasaka engile navaIsalele muKanane. Himwahulisa ngwenyi: ‘Achitave, Yehova, nguzauke Kalwiji Yotau, ngukamone lifuchi lyamwaza.’ Yehova ngwenyi: ‘Kunahu! Kanda muvuluka cheka lizu eliko!’ Unejiva chuma ahanjikilile Yehova ngocho tahi?

Mwomwo yachuma chasolokele omu Mose avetele kulilolwa. Nawanuka, ikiye naAlone kavavumbikile Yehovako. Kavalwezele vatu nge Yehova ikiye anehelenga meya kufuma mulilolwako. Shikaho Yehova ambile nge keshi kuvetavila kwingila muKananeko.

Hatukweji vavandende Alone hikufwa, Yehova mwalweza Mose ngwenyi: ‘Mbata Yoshuwa, nakumwimika kumeso akapilishitu Eleyaza navatu. Muvilike kumeso avatu, ngwove, Yoshuwa ikiye mwangana wamuhya.’ Mose himwalinga mwahanjikile Yehova, nge omu uli nakumona hamuvwimbimbi.

Yehova himwalweza Yoshuwa ngwenyi: ‘Likake, likolezeze. Yove mwingisa vaIsalele mulifuchi lyaKanane lize ngwavashikile, kahami nguli nayove.’

Jino Yehova mwalweza Mose kuya kuPili Nevo mulifuchi lyaMowave. Helu lyapili Mose hikutala musali yaKalwiji Yotau nakumona lifuchi lyamwaza lyaKanane. Yehova ngwenyi: ‘Eli likiko lifuchi ngwashikile kukahana kuvana vaApalahama, Isaka naYakova. Ngunakwitavisa ulimone oloze kaweshi kuhetamoko.’

Haze helu lyaPili Nevo, Mose hikufwa. Apwile namyaka 120. Apwile kanda azeye, nameso enyi apwile ape. Vatu hikunyengetela nakulila kufwa chaMose. Oloze vanawahilila hakuvahana Yoshuwa kupwa mwangana wavo wamuhya.

Kulava 27:12-23; Lushimbi lwamuchivali 3:23-29; 31:1-8, 14-23; 32:45-52; 34:1-12.