TAJTAQ Moisés tuʼn tokx toj Canaán kyukʼe aj Israel. Tuʼntzunju, tqʼama: ‹Qʼontza ambʼil weye Jehová tuʼn wikʼxe jlajxi nimaʼ Jordán, tuʼn twile, mo nlome aju tbʼanel txʼotxʼ›. Tqʼmatzun Jehová: ‹¡Miʼn! ¡Miʼn tzaj tmaʼna mastl tyola weye tiʼj jlu!› ¿Bʼiʼn tuʼne tiquʼn xi tmaʼn Jehová jlu te?

Tuʼnjo ikʼ tej tok tjubʼin Moisés abʼaj. Nantza: Mitiʼ jaw tnimen Moisés ex Aarón Jehová. Mitiʼ xi kyqʼamaʼn kye aj Israel qa tuʼn Jehová otaq tzʼetz aʼ toj abʼj. Tuʼntzen jlu, xi tmaʼn Jehová kye qa melaytoq che okx tuj Canaán.

Tikʼlenxitzun jun jteʼ xjaw tkyimlen Aarón, tzaj tqʼamaʼn Jehová te Moisés: ‹Qʼintza Josué, ex qʼonkuya twitz pal Eleazar ex kywitz kykyaqil tnam xjal. Ex qʼmanxa kye qa a Josué nejenel jaʼlin›. Ikxix bʼantju tuʼn Moisés, ik tzeʼnj tkuʼx tuj tilbʼilal.

Tzajtzun tqʼmaʼn Jehová te Josué: ‹Tenx tipuna ex kyuwx tkʼuʼja, quʼn aya kʼokex qʼin kye aj Israel tuj txʼotxʼ o txi ntziyene kyeye, ex aqine chin tel tukʼila›.

Tbʼajlenxi jlu, xi tqʼamaʼn Jehová te Moisés tuʼn tjax twiʼ witz Nebo aju tkubʼ toj Moab. Tiltzun Moisés aju tbʼanel txʼotxʼ te Canaán aju at tzmax jlajxi nimaʼ Jordán. Tzaj tqʼamaʼntl Jehová te: ‹Atzun txʼotxʼ jlu xi ntziyane tuʼn t-xi nqʼoʼne kye tiyjil, moqa tyajil Abrahán, Isaac ex Jacob. Ma txi nqʼoʼne ambʼil teya tuʼn t-xi tkeʼyina, pero miʼ pona tuj›.

Atz twiʼ witz Nebo kyim Moisés tej qʼiʼntaq 120 abʼqʼi tuʼn. Bʼaʼnxtoq ateʼ qe twitz ex atxtoq tipumal. O che bʼisinxix ex o che oqʼxix aj Israel tiʼj Moisés. Ax ikx in che tzalajtaq tuʼnju oteq tzʼok Josué te kynejenel.