Sturka 43

Jasua Ra Ta Uplika Mangkan

MOSES ba Israel uplika aikuki Kenan tasbaia ra dimaia want kan. Baha mita naku aisan: ‘Jehova, mamkabisna Jordan awalka ba lui, tasba pain ba kaikaia dukyara.’ Sakuna Jehova mita win: ‘Aitani sa! Naha dukyara kau sin aisapara!’ Dia muni Jehova mita baku win sapa nu sma ki?

Moses kipla ra prukan taim diara takan ba mita sa. Kupiam krauks: witin Eran wal Jehova ra kulkanka yabras kan ba. Witin nani taun uplika ra wiras kan, Jehova sika walpa ba wina li saki kan ba. Baha mita Jehova witin nani ra Kenan tasbaia ra dimaia swibia apia win.

Eran pruan ningkara, kati kum kum nani luan, bara Jehova mita Moses ra win: ‘Jasua ba brih, prîst Iliasar bara taun uplika nani mawanra mangks. Bara witin nani mawanra Jasua ba taun ta briaia lalka raya sa wis.’ Moses, Jehova dia win ba kat daukan, lilka ra kaikisma ba baku.

Bara Jehova mita Jasua ra win: ‘Karna bas, bara sibripara. Man Israel uplika nani ra, Kenan tasbaia ra ta briaia sma yang pramis munri kan ba baku, bara yang man wal kamna.’

Baha ningkara, Jehova mita Moses ra Muab tasbaia ra Nibu ilka purara uli wabia win. Baha pura wina Moses, Jordan awalka bara Kenan tasbaia painkira ba kaikaia sip kan. Bara Jehova mita win: ‘Naha tasbaia sika Ebraham, Aisak, bara Jekob luhpia nani ra yabaia pramis munri kan ba. Mai swiri kaikisma, sakuna maikrika dimma apia.’

Baha ilka, Nibu purara Moses pruan. Witin 120 mani bri kan. Witin kau karna kan bara ai nakra nani sin pain bri kan. Taun uplika nani ba sari tara brih, pyu ailal Moses dukyara ini kan. Sakuna lilia bangwi kan, Jasua ra taun ta briaia lalka baku bri kan ba mita.

Kulki kaikan 27:12-23; Kli smalkanka 3:23-29; 31:1-8, 14-23; 32:45-52; 34:1-12.