TA̱ Moisés kúni̱ra ndi̱ʼvira ñuu Canaán xíʼin na̱ ñuu Israel. Tasaá káchira: ʼJehová taxi ná ko̱sokavai̱ yu̱ta Jordán tasaá kunii̱ ñuʼú ña̱ káʼún taxiún ndaʼa̱ndi̱ʼ. Soo Jehová káchira xíʼinra: ʼXi̱va̱ʼa, kǒo ka̱ʼa̱nkaún xa̱ʼa ña̱yóʼo xíʼi̱nʼ. ¿Á xíni̱ún ndachun ni̱ka̱ʼa̱n Jehová ña̱yóʼo?

¿Á ndákaʼún xa̱ʼa ña̱ ku̱u tá ka̱ni ta̱ Moisés varara kandíka yu̱u̱? Miíra xíʼin ta̱ Aarón va̱ása níndasakáʼnuna Jehová. Kǒo níka̱ʼa̱nna xíʼin na̱ ñuu Israel xa̱ʼa Jehová, chi ta̱yóʼo kúú ta̱ ta̱vá ti̱kui̱í ña̱ kandíka yu̱u̱. Xa̱ʼa ña̱yóʼo ni̱ka̱ʼa̱n Jehová xíʼinna ña̱ kǒo ndi̱ʼvina ñuu Canaán.

Tá ni̱xi̱ʼi̱ ta̱ Aarón saá ni̱ya̱ʼa loʼo yo̱o̱, Jehová ni̱ka̱ʼa̱nra xíʼin ta̱ Moisés: ʼKa̱ʼa̱n xíʼin ta̱ Josué ná kixira ta ná kundichira nu̱ú su̱tu̱ ta̱ naní Eleazar xíʼin nu̱ú na̱ ñuu Israel. Ta nu̱ú ndiʼi na̱yóʼo ka̱ʼún ta̱ Josué kúú ta̱ kuniʼi yichi̱ nu̱úna vitinʼ. Ta̱ Moisés ke̱ʼéra ndiʼi ña̱ ni̱ka̱ʼa̱n Jehová xíʼinra, táki̱ʼva xítoún nu̱ú na̱ʼná yóʼo.

Tasaá ni̱ka̱ʼa̱n Jehová xíʼin ta̱ Josué: ʼNdakú koo iniún ta va̱ása yi̱ʼvíún. Yóʼó kúú ta̱ kuniʼi yichi̱ nu̱ú na̱ ñuu Israel ña̱ ndi̱ʼvina ñuu Canaán nu̱ú ñuʼú ña̱ ni̱ka̱ʼi̱n taxii̱ ndaʼa̱na, ta yi̱ʼi̱ kúú ta̱ kundaa yóʼóʼ.

Tándi̱ʼi ni̱ka̱ʼa̱n Jehová xíʼin ta̱ Moisés ná ndaara nda̱a̱ xi̱ní yuku̱ ña̱ naní Nebo ña̱ ndíka̱a̱ chí ñuu Moab. Nda̱a̱ xi̱ní yuku̱ kán ta̱ Moisés xi̱tora nu̱ú ndíka̱a̱ yu̱ta Jordán, ta saátu nda̱a̱ nu̱ú ndíka̱a̱ ñuʼú Canaán. Jehová káchira: ʼÑa̱yóʼo kúú ñuʼú ña̱ ni̱ka̱ʼi̱n taxii̱ ndaʼa̱ na̱ se̱ʼe ta̱ Abrahán, ta̱ Isaac xíʼin ta̱ Jacob. Va̱ʼa kotoún ñuʼú yóʼo, soo kǒo taxii̱ ndi̱ʼviún nu̱úñaʼ.

Xi̱ní yuku̱ Nebo ni̱xi̱ʼi̱ ta̱ Moisés tá ndíka̱a̱ra 120 ku̱i̱ya̱ra. Ta ndakúkavara ta túvikava nu̱úra tá ni̱xi̱ʼi̱ra. Na̱ ñuu Israel ni̱kusuchíkaví-inina ta ndiʼina xa̱kuna xa̱ʼara. Soo vitin kúsi̱í tuku inina chi ta̱ Josué kúú ta̱ kuniʼi yichi̱ nu̱úna.