TLAPOUALISTLI 43

Josué okitlalijkej ken tlayekanki

MOISÉS kineki kalakis Canaán iuan israelitas. Ik non, kijtoa: ‘Jehová, xinechkauili ma nipano itech aueyatl Jordán, pampa nikitas tlali tlen kuali’. Jehová kiluia: ‘¡Amo! ¡Uan amo oksepa xinechilui non!’. ¿Tikmati tleka ijkon okilui Jehová?

Ijkon okinankili pampa tlen opanok ijkuak Moisés okiuitek tepexitl. Xikilnamiki: Moisés uan Aarón amo okiueyichijkej Jehová. Amo okinmiluijkej israelitas ye Jehová akin okichi ma kisa atl itech tepexitl. Ik non, Jehová okinmilui amo kinkauiliskia ma kalakikan Canaán.

Ik non, sekimej metstli satepan omikik Aarón, Jehová okilui Moisés: ‘Xikuika Josué ixpan teopixki Eleazar uan inmixpan israelitas. Uan ompa, inmixpan nochtin xikinmilui axkan Josué tlayekanas’. Moisés ijkon okichi ken Jehová okijto, ijkon ken tikita itech tlaixkopinal.

Ijkuakon, Jehová okilui Josué: ‘Ximoyolchikaua, uan amo ximomojti. Tikinyekanas israelitas uan tikinuikas itech tlali Canaán tlen onikijto nikinmakas, uan ne mouan niyetos’.

Satepan, Jehová okilui Moisés ma tlejko ipan tepetl Nebo tlen okatka itech Moab. Ompa, Moisés otlachixki okachi nepa itech aueyatl Jordán uan okitak kuajkualtsin tlali Canaán. Jehová okijto: ‘Nin tlali tlen onikijto nikinmakas ikoneuan Abrahán, Isaac uan Jacob. Te yotikitak, maski ijkon, amo nimitskauilis tikalakis ompa’.

Ompa, ipan tepetl Nebo, Moisés omikik. Okajxiti 120 xiuitl. Ok ochikajtoka uan ok kuali otlachiaya. Israelitas omoyolkokojkej miak uan nochtin okichokilijkej Moisés pampa omikik. Maski ijkon, noijki oyolpakej pampa axkan Josué kinyekanaskia.

Números 27:12-23; Deuteronomio 3:23-29; 31:1-8, 14-23; 32:45-52; 34:1-12.