Historia 43

Josué peua tlayekana

MOISÉS kineki kalakis Canaán iuan israelitas. Ika yejon, kijtoua: ‘Jehová, xnechkauili manikpanaui atentli Jordán, niman ijkon manikita kuajli tlajli’. San ika, Jehová kinankilia: ‘¡Maka sa xnechpasolo! ¡Yonimitsijli ika ka!’ ¿Tikmatstika tejua tleka ijkon kinankilia?

Ijkon kinankilia pampa xkuajli tlen okichiuj Moisés ijkuak okiuitek tetl. Xkilnamiki: yejua iuan Aarón xokiueyichiujkej Jehová. Xokijlikej israelitas ika Jehová yejua akin kikixtijtoya atl ipan tetl. Ika yejon, Jehová okimijli ika xkinkauiliskia makalakikan Canaán.

Kuakon, san seki metstli opanok ijkuak omik Aarón, Jehová kijlia Moisés: ‘Xkanati Josué, niman xtlali ixpan teopixki Eleazar, iuan imixpan israelitas. Niman ompa, imixpan nochimej, xkimijli ika Josué yejua yenkuik tlayekanketl’. Moisés kichiua ken Jehová kijlia ijkon ken nesi ipan tlaixkopinajli.

Kuakon Jehová kijlia Josué: ‘Xmoyolchikaua, maka xmomojti. Tikinyekanas israelitas niman tikinuikas ipan tlajli Canaán tlen onikimijlika nikinmakas, niman nejua mouan ninemis’.

Sakin, Jehová kijlia Moisés matlejko ikuatipan tepetl Nebo, tlen onka ipan tlajli Moab. Ompa Moisés ueli konita atentli Jordán niman kita kualtsin tlajli Canaán. Jehová kijlia: ‘Yejuin tlajli tlen yonikinmijlika nikinmakas ikoneuan Abrahán, Isaac niman Jacob. Yonimitskauili xkita, san ika, aman xnimitskauilis xkalaki’.

Ipan ikuatipan tepetl itoka Nebo, miki Moisés ijkuak kipiaya 120 xiuitl. Yejua ok chikauak katka niman kuajli tlachiaya. Israelitas onoyolkokojkej, nochimej okichokilijkej Moisés. San ika, noijki pakij pampa aman, Josué peua tlayekana.

Números 27:12-23; Deuteronomio 3:23-29; 31:1-8,14-23; 32:45-52; 34:1-12.