Ekitebyo 43

Yoshua Okuhinduka Omwebembezi

MUSA naayenda kutaaha omuri Kanaani n’Abaisraeli. Nikwo kubuuza ati: ‘Yehova, nyikiriza nyambukye, ndeebe ensi egyo enungi eri seeri y’Omugyera Yorudani.’ Kwonka Yehova amugira ati: ‘Rekyera aho! Otakaagaruka kungambira ekyo kigambo!’ Noomanya ahabw’enki Yehova yaagizire atyo?

N’ahabw’ekyabaireho obu Musa yaateera orukiri. Ijuka ngu we, na Arooni tibarahaisize Yehova ekitiinisa. Tibaragambiire bantu ngu akaba ari Yehova owaaretsire amaizi kuruga omu rukiri. Ahabw’enshonga egi Yehova akagira ngu akaba atarikuza kubaikiriza kuza omuri Kanaani.

N’ahabw’ekyo emyezi mikye bwanyima y’okufa kwa Arooni, Yehova agambira Musa ati: ‘Twara Yoshua, omwemereze omu maisho ga Eleazaari omunyamurwa hamwe n’omu maisho g’abantu. Kandi aho omu maisho gaabo boona, obagambire ngu Yoshua niwe mwebembezi omusya.’ Musa akora nk’oku Yehova yaagambire, nk’oku orikureeba omu kishushani.

Kandi Yehova agambira Yoshua ati: ‘Guma, ba emanzi kandi otakaatiina. Noija kwebembera Abaisraeli omu nsi ya Kanaani ei naabaraganiise, kandi niinyija kuguma hamwe naiwe.’

Bwanyima Yehova agambira Musa okutemba ahaiguru aha Rushozi Nebo omu nsi ya Moabu. Ari ahaiguru okwo, Musa abaasa kureeba seeri y’Omugyera Yorudani kandi n’okureeba ensi nungi egyo eya Kanaani. Yehova agira ati: ‘Egi niyo nsi eyi naaraganiise kuha abaana ba Abrahamu, Isaaka na Yakobo. Naakwikiriza kugireeba, kwonka tindikwikiriza kugitaahamu.’

Okwo aha Rushozi Nebo Musa afeerayo. Akaba aine emyaka 120 y’obukuru. Akaba akiine amaani, kandi n’amaisho ge gakaba gakiri marungi. Abantu batyo bashaasha munonga kandi bacura ahabw’okuba Musa afiire. Kwonka bashemererwa ahabw’okutunga Yoshua nk’omwebembezi waabo omusya.

Okubara 27:12-23; Eky’Ebiragiro 3:23-29; 31:1-8, 14-23; 32:45-52; 34:1-12.