MOSISI kulo kɛ ɔ nee Yizilayɛma kɔ Keena. Ɔti ɔzɛlɛle kɛ: ‘Gyihova, maa mempɛ Azule Dwɔdan ne, na mengɔnwu azɛlɛ kpalɛ ne.’ Na Gyihova buale ye kɛ: ‘Yeyɛ boɛ! Mmaka ɛhye anwo edwɛkɛ bieko ɛkile me!’ Ɛze deɛ mɔɔ ɔti Gyihova buale ye zɔ la ɔ?

Ɔlua mɔɔ ɔzile wɔ mekɛ mɔɔ Mosisi bɔle bolɛ ne la ati ɔ. Kakye kɛ, ɔ nee Aalɔn anva anyunlunyia ammaa Gyihova. Bɛanga bɛangile menli ne kɛ Gyihova yɛɛ ɛlɛfa nzule avi bodane ne anu amaa bɛ a. Ɔlua ɛhye ati Gyihova hanle kɛ ɔnrɛmaa bɛnrɛhɔ Keena.

Yemɔti Aalɔn wule na mekɛ guale nu ekyii la, Gyihova hanle hilele Mosisi kɛ: ‘Ye Dwɔhyua na maa ɔgyinla ɛsɔfo Ɛlieza nee menli ne anyunlu. Na kpakye nu ka maa bɛ muala bɛde kɛ Dwɔhyua a le bɛ adekilevolɛ fofolɛ ne a.’ Kɛmɔ ɛnwu ye wɔ nvoninli ne anu la, Mosisi yɛle mɔɔ Gyihova hanle la pɛpɛɛpɛ.

Akee Gyihova hanle hilele Dwɔhyua kɛ: ‘Mmasulo, gyinla kpundii. Ɛbali Yizilayɛma ati wɔahɔ Keena azɛlɛ ne mɔɔ menvale membɔle bɛ ɛwɔkɛ la azo, na me nee wɔ balua.’

Nzinlii Gyihova hanle hilele Mosisi kɛ ɔvo ɔhɔ Nibo Boka ne mɔɔ wɔ Mowabe la azo. Wɔ ɛkɛ ne Mosisi bahola anwu Azule Dwɔdan ne anzi na yeanwu Keena azɛlɛ kɛnlɛma ne. Gyihova zele kɛ: ‘Azɛlɛ ne mɔɔ menvale membɔle Ebileham, Ayezeke, nee Gyekɔbo ɛwɔkɛ kɛ mebava meamaa bɛ bo zo amra la ɛne. Memaa ɛ nye nwiɔ ɛnwu ye, noko menrɛmaa ɛ gyakɛ ba ɛnrɛtia zolɛ.’

Mosisi wule wɔ Nibo Boka ne azo. Ɛnee yeli ɛvolɛ 120. Ɛnee ɔtɛdɛ anwosesebɛ, na ɔ nye noko nwu debie kpalɛ. Menli ne lile alɔbɔlɛ na bɛzunle ɔboalekɛ Mosisi ɛwu. Noko bɛ nye liele kɛ Dwɔhyua ɛrayɛ bɛ adekilevolɛ fofolɛ a.