ਮੂਸਾ ਵੀ ਇਸਰਾਏਲੀਆਂ ਨਾਲ ਕਨਾਨ ਦੇਸ਼ ਜਾਣਾ ਚਾਹੁੰਦਾ ਸੀ। ਇਸ ਲਈ ਉਸ ਨੇ ਯਹੋਵਾਹ ਨੂੰ ਕਿਹਾ: ‘ਯਹੋਵਾਹ, ਮੈਨੂੰ ਵੀ ਯਰਦਨ ਨਦੀ ਦੇ ਉਸ ਪਾਰ ਸੋਹਣੇ ਦੇਸ਼ ਨੂੰ ਦੇਖਣ ਦੀ ਇਜਾਜ਼ਤ ਦੇ।’ ਯਹੋਵਾਹ ਨੇ ਜਵਾਬ ਦਿੱਤਾ: ‘ਬਸ ਕਰ! ਫਿਰ ਇਸ ਗੱਲ ਦਾ ਜ਼ਿਕਰ ਨਾ ਕਰੀਂ!’ ਕੀ ਤੁਸੀਂ ਜਾਣਦੇ ਹੋ ਯਹੋਵਾਹ ਨੇ ਮੂਸਾ ਨੂੰ ਇੰਜ ਕਿਉਂ ਕਿਹਾ ਸੀ?

ਕੀ ਤੁਹਾਨੂੰ ਉਹ ਕਹਾਣੀ ਯਾਦ ਹੈ ਜਿਸ ਵਿਚ ਚਟਾਨ ਵਿੱਚੋਂ ਪਾਣੀ ਨਿਕਲਿਆ ਸੀ? ਯਾਦ ਕਰੋ, ਮੂਸਾ ਤੇ ਹਾਰੂਨ ਨੇ ਘਮੰਡ ਨਾਲ ਕਿਹਾ ਸੀ ਕਿ ਉਹੀ ਚਟਾਨ ਵਿੱਚੋਂ ਪਾਣੀ ਕੱਢਣਗੇ, ਪਰ ਅਸਲ ਵਿਚ ਚਟਾਨ ਵਿੱਚੋਂ ਪਾਣੀ ਯਹੋਵਾਹ ਨੇ ਕੱਢਿਆ ਸੀ। ਯਹੋਵਾਹ ਦੀ ਵਡਿਆਈ ਕਰਨ ਦੀ ਬਜਾਇ ਮੂਸਾ ਤੇ ਹਾਰੂਨ ਨੇ ਆਪਣੀ ਵਡਿਆਈ ਕੀਤੀ ਸੀ। ਇਸ ਲਈ ਯਹੋਵਾਹ ਨੇ ਉਨ੍ਹਾਂ ਨੂੰ ਕਿਹਾ ਸੀ: ‘ਤੁਸੀਂ ਮੇਰੇ ਲੋਕਾਂ ਨਾਲ ਕਨਾਨ ਦੇਸ਼ ਨਹੀਂ ਜਾਓਗੇ।’

ਹਾਰੂਨ ਦੇ ਮਰਨ ਤੋਂ ਕੁਝ ਮਹੀਨਿਆਂ ਪਿੱਛੋਂ ਯਹੋਵਾਹ ਨੇ ਮੂਸਾ ਨੂੰ ਕਿਹਾ: ‘ਯਹੋਸ਼ੁਆ ਨੂੰ ਅਲਆਜ਼ਾਰ ਜਾਜਕ ਅਤੇ ਸਾਰੀ ਪਰਜਾ ਦੇ ਅੱਗੇ ਖੜ੍ਹਾ ਕਰ। ਉਨ੍ਹਾਂ ਸਾਰਿਆਂ ਦੇ ਸਾਮ੍ਹਣੇ ਐਲਾਨ ਕਰ ਕਿ ਯਹੋਸ਼ੁਆ ਨਵਾਂ ਆਗੂ ਹੈ।’ ਤੁਸੀਂ ਤਸਵੀਰ ਵਿਚ ਦੇਖ ਸਕਦੇ ਹੋ ਕਿ ਜਿੱਦਾਂ ਯਹੋਵਾਹ ਨੇ ਕਿਹਾ ਸੀ, ਮੂਸਾ ਨੇ ਉੱਦਾਂ ਹੀ ਕੀਤਾ।

ਯਹੋਵਾਹ ਨੇ ਯਹੋਸ਼ੁਆ ਨੂੰ ਕਿਹਾ: ‘ਤਕੜਾ ਹੋ ਅਤੇ ਡਰੀਂ ਨਾ। ਤੂੰ ਇਸਰਾਏਲੀਆਂ ਨੂੰ ਉਸ ਕਨਾਨ ਦੇਸ਼ ਵਿਚ ਲੈ ਜਾਵੇਂਗਾ ਜਿਸ ਦਾ ਮੈਂ ਉਨ੍ਹਾਂ ਨਾਲ ਵਾਅਦਾ ਕੀਤਾ ਹੈ ਅਤੇ ਮੈਂ ਤੇਰੇ ਅੰਗ-ਸੰਗ ਹੋਵਾਂਗਾ।’

ਬਾਅਦ ਵਿਚ ਯਹੋਵਾਹ ਨੇ ਮੂਸਾ ਨੂੰ ਮੋਆਬ ਦੇਸ਼ ਵਿਚ ਪੈਂਦੇ ਨੀਬੋ ਪਹਾੜ ਦੀ ਚੋਟੀ ਉੱਤੇ ਜਾਣ ਲਈ ਕਿਹਾ। ਉੱਥੋਂ ਮੂਸਾ ਯਰਦਨ ਨਦੀ ਦੇ ਪਰਲੇ ਪਾਸੇ ਕਨਾਨ ਦੇਸ਼ ਦਾ ਸੋਹਣਾ ਨਜ਼ਾਰਾ ਦੇਖ ਸਕਦਾ ਸੀ। ਯਹੋਵਾਹ ਨੇ ਮੂਸਾ ਨੂੰ ਕਿਹਾ: ‘ਇਹ ਉਹੀ ਦੇਸ਼ ਹੈ ਜੋ ਮੈਂ ਅਬਰਾਹਾਮ, ਇਸਹਾਕ ਅਤੇ ਯਾਕੂਬ ਦੇ ਬੱਚਿਆਂ ਨੂੰ ਦੇਣ ਦਾ ਵਾਅਦਾ ਕੀਤਾ ਸੀ। ਮੈਂ ਤੈਨੂੰ ਇਹ ਦੇਖਣ ਦਿੱਤਾ ਹੈ, ਪਰ ਇਸ ਵਿਚ ਜਾਣ ਨਹੀਂ ਦਿਆਂਗਾ।’

ਇਸੇ ਪਹਾੜ ਉੱਤੇ ਮੂਸਾ ਦੀ ਮੌਤ ਹੋ ਗਈ। ਮੂਸਾ ਜਦ ਮਰਿਆ, ਤਾਂ ਉਸ ਦੀ ਉਮਰ 120 ਸਾਲਾਂ ਦੀ ਸੀ। ਪਰ ਉਸ ਦੀ ਨਜ਼ਰ ਅਤੇ ਸਿਹਤ ਅਜੇ ਕਮਜ਼ੋਰ ਨਹੀਂ ਹੋਈ ਸੀ। ਮੂਸਾ ਦੀ ਮੌਤ ਕਰਕੇ ਲੋਕ ਬਹੁਤ ਦੁਖੀ ਹੋਏ। ਪਰ ਇਕ ਗੱਲ ਦੀ ਉਨ੍ਹਾਂ ਨੂੰ ਖ਼ੁਸ਼ੀ ਸੀ ਕਿ ਯਹੋਵਾਹ ਨੇ ਯਹੋਸ਼ੁਆ ਨੂੰ ਉਨ੍ਹਾਂ ਦਾ ਨਵਾਂ ਆਗੂ ਚੁਣਿਆ ਸੀ।