MOSES hem want for go insaed long Caʹnaan witim olketa Israelite. So hem ask olsem: ‘Letem mi for akrosim Jordan River, Jehovah, and lukim datfala gudfala land.’ Bat Jehovah hem sei: ‘Iu no askem datwan! No tok abaotem diswan moa!’ Waswe, iu savve why nao Jehovah talem diswan?

Hem from samting wea happen taem Moses hem hitim datfala ston. Remember hao hem and Aaron no honorim Jehovah. Olketa no talem olketa pipol hao Jehovah nao givim wata from datfala ston. From diswan nao Jehovah sei hem bae no letem olketa for go insaed long Caʹnaan.

So tu-thri month bihaen Aaron hem dae, Jehovah talem Moses: ‘Tekem Joshua, and mekem hem standap front long priest E·le·aʹzar and olketa pipol. And front long evriwan, talemaot hao Joshua nao hem niufala leader.’ So Moses hem duim evri samting wea Jehovah talem, olsem iu savve lukim insaed long piksa.

Then Jehovah talem Joshua: ‘Iu mas strong, and no fraet. Iu bae leadim olketa Israelite go insaed long land bilong Caʹnaan wea mi promisim long olketa, and mi bae stap witim iu.’

Bihaen, Jehovah talem Moses for klae go antap long Maunt Neʹbo long land bilong Moʹab. Long there, Moses savve luk go narasaed long Jordan River and lukim barava naesfala land bilong Caʹnaan. Jehovah hem sei: ‘Diswan nao land wea mi promis for ­givim long olketa pikinini bilong Abraham, Isaac and Jacob. Mi letem iu for lukim, bat mi bae no letem iu for go insaed.’

Long there, antap long Maunt Neʹbo, Moses hem dae. Hem 120 year. Hem still strong and eye bilong hem still savve lukluk gud. Olketa pipol feel sorre and krae bikos Moses hem dae. Bat olketa hapi for garem Joshua olsem niufala leader bilong olketa.